No.3295/2019-2020

Tunlaia Novel Coronavirus (COVID-19) hri leng mek chungchang leh India Prime Minister-in March ni 25 - April ni 14, 2020 thleng (ni 21 chhung) ram puma inkharkhip (complete lockdown) a puan bawhzui dan tur leh mipuite'n harsatna an tawh loh nana hma lak dan tur ngaihtuahin nimin tlai khan Lunglei District Task Force on Covid-19 chu an Chairman, Lunglei DC Pu R.Vanrengpuia kaihhruaiin DC Conference Hall-ah an thu khawm.

He inkharkhip hi tha taka zawm a nih theih nan mawhphurtu hrang hrang insiam a ni a. Lunglei District huam chhunga khua leh Veng hrang hrang Village Level Task Force leh volunteer te chhun zan zawma duty hna an thawh chungchangah member kal khawmte chuan lawm thu sawiin, he an hna thawh hi chhunzawm zel tura beisei an ni a.  

Hemi chhung hian mipuiin ei leh bar leh an nitin mamawh an tlakchham loh nan ruahmanna siam a ni a. Mipui mimir chhuakvak lova VLTF kaltlanga eibar lakkhawm dan kawng dap theih ni se tih Committee chuan a rel a. Hemi chungchangah hian VLTF-te chu hma lo la a, hetianga mipui chhuak vak lova eibar thil mamawhte lak khawm leh pek dan kawng remchang ngaihtuah turin ngen an ni a. Branch YMA tinte pawhin VLTF hmalakna hi anlo tawiawm theihnan Sub Hqrs YMA pawh ngen ni se tih a ni. Mipui mimir chhuakvak lova VLTF te kaltlanga eibar lak khawm leh in pek ala remchan hma emaw, ruahmanna dang a awm hma pawhin dawrah te inhnawh lo leh metre khat (1) tala in din hlata thil lei turin DLTF chuan mipuite a hriattir a ni.

He inkharkhip chhung hian ei leh bar leh hriselna lam bakah, tui, kawlphetha, inbiak pawhna leh mipui mamawh zualpui dangte tlakchham a awm loh nan a kaihhnawih department te chu theih tawp chhuah tura ngen an ni a. Mipuite pawh anmahni leh ram himna tur a ni tih hriaa ina inkhung tur leh thuneitute'n fimkhurna tur hrang hrang an duante zawm a, sawrkar leh tualchhunga hma latute thu chhuak ngaichang thiam turin District Task Force on COVID-19 chuan a ngen a ni.