No.7158/2020-2021

Vawiin khan Lunglei CMO Dr LC Liana kaihhruaiin a office chamber-ah Covid-19 hri danna (Vaccine) naktuka pek chhuah tur chungchangah Press Meet neih a ni. He hunah hian Lunglei SMO Dr Lalrinthangi leh official dangte leh Lunglei District media mi te an tel a ni.

Naktuk January ni 16, 2021-a India Prime Minister Narendra Modi-a'n a tlangzarh veleh a COVID-19 hri danna (vaccine) pekchhuah dan tur sawrkar laipuiin a ruahman chu Lunglei District tana tha taka kalpui turin engkim inpuahchah fel anih tawh thu Lunglei CMO Dr LC Liana chuan kalkhawmte a hrilh a. Lunglei District-a hman turin Serum Institute of India, Pune siam, Covishield vaccine dose 1250 nimin khan alo thlen thu a sawi bawk.  Naktuk January ni 16, 2021-a vaccine pek thawhkhatnaah hi Lunglei Civil Hospital-ah neih tur niin health care worker mi 100 pek an ni dawn a. Covid-19 vaccine dawng thei tur hian Lunglei District pumah Health Care worker mi 2050 ziahluh an ni tawh a ni. 

Lunglei CMO Dr LC Liana chuan Covid-19 vaccine chu  uluk taka enchhinna kalpui alo nih tawh avangin a haluhawm lohva, a him tawk a ni tiin Lunglei Districta Covid-19 hri danna (vaccine) pekchhuah hna hlawhtling taka kalpui anih theihnan sawrkar Department, NGO, media mite leh Lunglei District mipuite thawhho puiah a sawm a ni.

 Lunglei Civil Hospital-a Covid-19 vaccine pek chhuahna hmun session site hi Civil Hospital Building Top Floor-ah neih tur niin ruahmanna felfai tak siam a ni tawh a. Vaccine pe chhuak tu te bakah Vaccination Officer pali (4) an duty reng dawn a. Social Distancing maintain chunga intlarna tur ruahman niin Waiting Room, Vaccination room bakah vaccine dawn zawha minute 30 an hahchawlhna hmun tur Observation Room a awm dawn bawk a. Vaccine lak zawha engemaw harsatna nei anlo awm palh anih chuan AEFI (Adverse Event Following Immunization) kit dah lawk sa niin doctor leh nurse ten hemi hmang hian an enkawl nghal dawn a ni. Vaccine hi mi pakhat tan dose 2 lak tur niin dose khatna lak hnu ni 28 ah dose hnihna lak leh tur a ni a. Covid vaccine hi company hrang hrang siam mi pakhat in a lak pawlh tur ani lo a, naktuka Covishield vaccine la tur te pawh hian a dose hnihna ah Covishield vek hi an la leh ngei tur a ni. 

Vaccination pek chhuah hna hi sawrkar laipui ruahmanna angin CoWIN (Covid Vaccine Intelligence Network) Application hmanga kalpui tur niin he application ah hian Report thehluh nghal zel a ni dawn a. He CoWIN application buaipui tu tur bik Officer ruat an ni bawk.