2326/2022-2023
Lunglei tha 14th October 2022 : Vawiin khan District Education Office, Conference Hall, Lungleiah CSR kaltlanga saptawng zirna English Language Forum (ELF) English Programme hmalakna in Lunglei District chhunga Primary School sawmruk pakhat atanga English zirtirtute pualin Teachers Training neih a ni.

He hun hi Pi K. Lalrintluangi, Dy. DPC, Samagra Shiksha, Lunglei chuan kaihruaiin thuhma sawiin Lunglei Bawrhsap Pu Kulothungan A, IAS hmalakna in Lunglei District zirlaiten ELF Learning Solutions Pvt Ltd kaltlanga saptawng a bulthum an zir theihna tura hmalakna kumin June thla atanga bultan chu kalpui chhunzawm zel a ni a. He hmalakna hi saptawng thiamna ah zirlai te tan malsawmna nih a beisei bakah saptawng a an inbiak pawh theihnan leh inrintawkna an neih theih nan a pawimawh thu sawiin zirtirtute pawhin naupangte tan tangkai thei tur ang bera training hi hmang turin a sawm a ni.

He hunah hian Lunglei District chhunga School 61 atangin zirtirtu 72 hnenah ELF Learning Solutions Pvt, Ltd hnuaia Project Manager pahnih Aradhana Srikanth, Ayshwaria Sekhai leh Documentation official Smitha Tumuluru ten thupui hrang hrang Teachers Training, Video Lessons, Workbooks leh Outcome tracking hmangin zirtirna an pe a ni.

English Language Forum (ELF) English Programme hi ELF Learning Solution Pvt, Limited, Chennai kaltlangin CSR cheng nuai 12 hmanga bultan a ni. He hmalakna hnuaiah hian Lunglei District chhunga School 61 thlan chhuah atanga Primary School naupang 3000 ten English an zir dawn a ni.