2325/2022-2023

Aizawl the 14th October, 2022 : Vawiin khan Govt. Chaltlang High School ten an school tual-ah Golden Jubilee an lawm a, School Education Minister Pu Lalchhandama Ralte chu Khuallian a ni.

Minister chuan sorkarin zirna a ngaih pawimawh avangin hripui len lai pawhin naupangten kum an hloh loh nan a theih ang angin zirna a kalpui tih a sawi a. Hripui karah Board exam a hun takah neih a ni a, Online class te, tutorial video clip te, mid-day meal te pawh pek chhuah zel a ni, tiin thawktute inpekna chu lawmawm a tih thu a sawi.

Minister chuan thawktu lak chungchangah pawh Education sector huam chhungah zirtirtu 2500 chuang lak an ni tawh a ti a. Tunah hian MPSC kaltlangin thawktu nghet, teacher te, Headmaster te leh CEO te lak leh mek a ni, a ti a.

Sawrkar enkawl zirna inah mipuiin rinna an nghat chho zel a, enrollment a sing telin a pung chho a ni, a ti a. Tam lama hmasawnna rualin quality education neih theih nan khawtlang hruaitute, kohhran leh tlawmngai pawl te țanho țhat a ngai a ni a ti a. Hemi kawngah hian sawrkar finchhuah a, thurawn pe fo turin a sawm a. Zirna kan ngaihsan a, thawhhona țha kan neih chuan kan ram ke pen hi a dik dawn a ni, a ti.

Minister chuan Zoram puma zirtirtute chu naupangte hmangaihna nen zirtir tur te, intuai hriama țan la chhunzawm zel turtein a sawm a, zirlaite chu zirna an dawn ang ang din chhuahpui nana hmang țangkai tur te leh fa hrin manhla ni tur tein a chah bawk a ni.

Khualzahawm Pu Vanlalhlana MLA pawhin thu sawiin sorkarin zirna a ngai pawimawh chu a tih awm reng a ni a ti a, MLA te pawhin zirna a theih ang anga thuam belh hi an tih tur a nih thu a sawi a. Zirlaite chu ruihhlo laka inthiar fihlim tur te leh HIV/AIDS laka him tura fimkhur turin a fuih bawk a ni.

Govt. Chaltlang High School hi kum 1972 khan din a ni a, kum 1973-ah Adhoc Grant in aid-ah hlan kai niin kum 1981-ah Deficit-ah dah a ni a. Kum 1991 ah sawrkar-in lain tunah hian zirlai class IX-154 leh class X-136 an vaiin 290 an awm a, zirtirtu -17 an awm mek a ni.

Govt. Chaltlang High School Golden Jubilee lawmnaah hian he School Managing Board a lo awm tawh te, thawk tawh te, zir chhuak te, khawtlang hruaitute, Chaltlang veng zirna in hrang hranga thawk te, kumina zirlai leh zirtirtute an tel țha hle a ni.