2485/2024-2025

2024 Khuangchawi thla ni 11: Mizoram Journalists' Association (MJA) leh Mizoram Police ṭang kawp chuan vawiin chawhma dar 11:00 khan Lunglei Press Club-ah internet kal tlanga pawi khawihna leh dan bawhchhiatna chungchang zir hona, "Seminar on Cyber Crime" an buatsaih.

He hun hmanpuitu Lunglei High Powered Committee (HPC) Vice Chairman Pu V. Malsawmtluanga MLA chuan cyber crime chu tunlai khawvelah mi tinin kan tuar a, Zoram kilkhawr berah pawh kan tuar nasa hle a ni tiin, a bik takin politician-te phei chu a tuar nasa zinga mi an nih thu a sawi a. Thu dik tawk lo leh dik ziktluak lote dawt hmanga inchirhthehna avang tein mi tam takin harsatna leh hmingchhiatna an tawk ṭhin tih sawiin, heti ang kawngah hian dan kengkawhtute pawhin huaisen taka hrem ngai chu hrem ngam tura an insan mar a ṭul hle a ti a. Journalist-te chu mipuite rin tlak thu puangzartu nia ngaih an nih laiin, tunlai khawvelah journalist-te kal tlanga thu dik leh belh chian dawl puan chhuah ngaichang hman lo va, social media-a thu dik lo leh dawt theh darh a tam em em chu a Kristian lovin, Zo nun ze mawi tihmelhemtu leh Pathian pawi sawina lian tak nia a hriat thu a sawi a. Cyber crime chungchang zir honaa telte chu a taka hmang ṭangkaitu nih tum turin a chah a ni.

Seminar hi MJA General Headquarters President Pu Lalrambuatsaiha'n a kaihruai a. MJA Lunglei District President Pu Laltlanthanga'n inlawmna thu a sawi a. MJA General Headquarters General Secretary Pu K. Zothanpara leh Lunglei District MJA Secretary Pu Rodingliana Khiangte te hnen aṭangin report ngaihthlak a ni bawk.

Vawiina Lungleia Cyber Crime Seminar buatsaihah hian Lunglei District MJA member-te bakah, District Police leh tlawmngai pawl ai awhte telin, MJA General Headquarters hruaitu eng emaw zatin an telpui bawk a. Pu MS Dawngliana, Inspector, Mizoram Police Cyber Crime Cell chuan cyber crime awmzia leh a kaihhnawiha pawih khawih leh inbum theih dan hrang hrangte leh a hrem theih dan te bakah, cyber crime laka inven dan tur te a zirtir a. Zawhna leh chhanna hun hman a ni bawk a. MJA General Headquarters Secretary Pu Lalnunzira Chawngthu chuan lawm thu sawiin hun a khar a ni.