2484/2024-2025

Dated Hnahthial, the 11th October, 2024: Vawiin chawhma dar 10:30 khan Govt Hnahthial College chuan College Week kharna hun an hmang a, he hun hi South Tuipui Bialtu MLA Pu Jeje Lalpekhlua chuan khuallian niin a hmanpui a ni.

Thu sawiin, khuallian Pu Jeje Lalpekhlua chuan Govt Hnahthial College in an week kharna hmanpui tura an sawm chu lawmawm a tih thu leh zirlai naupangte chu kawng engkima Hnahthial District hmel lanna an nih avangin an nunchang thlenga an fimkhur a tul thu a sawi a. Ruihhlo bakah zuk leh hmuam chu rilru leh taksa thlenga harsatna thlen thei anih avangin ti lo tawp turin zirlaite chu a ngen a. Zirlai naupangte chu an kal zelna turah thutlukna an siam dawn reng rengin thurawn la hreh lo turin a chah bawk a ni.

MLA chuan college zirtirtute chu Mizoram pum huap pawh a zirtirtu tha ber ber te an ni a ti a. Hnahthial district in kan neih chhun, kan college hi kan ngaihlut a tul a tih thu te, khawvel changkang zelah engkim a awlsam tawh a, zirna in piah lam thleng pawhin mahni a inzir zel a pawimawh a tih thute a sawi a. Sawrkarin thalaite tan nasa takin hma a la a, hei vang hian policy tha tak duangin, chung zingah hand holding policy te zirchiang a, a theihna zawn a hma la ve theuh turin a chah bawk a ni. 

Hnahthial District a PWD Division leh Sub Division bakah DTO te hawn thuai anih tur thu sawiin Power Supply lama buaina ber pakhat 132kV Sub Station pawh hmalak a nih thuai a beisei thu a sawi bawk.

College Week-ah hian inelna chi hrang hrang buatsaih a ni a. Best Girl atan C. Zorinpuii, 5th Semester thlan niin Best Boy atan H. Lalchhanhima, 3rd Semester chu thlan a ni a. Govt Hnahthial College Miss atan Lalhmingthangi, 1st Semester leh Mister atan Vanlalmalsawmsanga, 1st Semester te chu thlan an ni.

Govt Hnahthial College ah hian Department pasarih (7) awmin zirlai naupang za leh sawm (110) an awm a. NAAC 'B' Grade an ni mek a ni.