4210/2025-2026

Lunglei, 2026 Pawlkut thla ni 29: Nimin khan Lunglei District Agriculture Marketing Committee (DAMC) chu kum 2026-a a hmasa ber atan an Chairman, District Bawrhsap Pi Navneet Mann kaihhruaiin a hna thawh pindanah an ṭhu khawm a. Kumina Bana Kaih hnuaia kut hna thawktute sawhthing thar chhuah lei leh hralh kalpui tur atana inpuahchahna hrang hrangte an thlir ho.

Lunglei DAMC chuan Mizoram Agricultural Marketing Board (MAMB) aṭanga inkaihhruaina (guideline) thar kalpui dan tur leh Primary Collection Centre (PCC) Office Bearer-te nem ngheh chungchang an sawi ho va. PCC aṭanga report chipchiar dawn kim hunah OB-te chu nem ngheh ni se, an ti.

Nikum lama sawhthing ching an awm loh avanga PCC nei lo khuate chungchang pawh sawi ho niin, chu'ng khuaa sawhthing hralh tur neite chu an chhehvela Secondary Collection Centre (SCC)-te'n remchang an tih angin inremna ziahpuiin, an sawhthing hralh tur chu lo buaipuisak mai se, tih a ni a. Ṭawipui SCC, Haulawng SCC, Hrangchalkawn SCC leh Buarpui SCC atan Supervisor leh Assistant Supervisor ruat thar an ni a. SCC sawhthing chhekna kudam hrang hrang endikna report ngaihthlak niin, Hrangchalkawn SCC-in an mamawh chuan sawhthing chhekna atan Horticulture godown chu hman belh theih a nih thu tar lan a ni bawk.