545/2025-2026

Lunglei, 2025 Ṭomir thla ni 23: Nimin tlai khan Lunglei Deputy Commissioner (Bawrhsap) office leh Agricultural and Processed Food Products Export Development Authority (APEDA) Tripura te ṭang kawp chuan Lunglei DC Video Conference Room-ah APEDA kal tlanga kut hna thawktute thei leh thlai thar chhuahte ram pawna thawn chhuah dan leh APEDA hnuaia ruahmanna (scheme) hrang hrang zir hona an buatsaih.

He hunah hian DC office, Agriculture leh Horticulture Department official-te, thei leh thlai thar chhuah leh sawngbawl buaipuitu pawl hrang hrang - NEIDA, Lushai Agriculture Producer Company Ltd, Ṭawitlang Farmer Producer Company, Blue Mount Farming Society leh Zotlang Self Help Group-II ai awhte leh Bawbawihi Food Processing leh RAFA Probiotic Juice neitute an tel a. Hun hmanpuitu Lunglei District Bawrhsap Pi Navneet Mann chuan kut hna thawktute thar chhuah leh thei leh thlai aṭanga thil siam chhuahte hlawk zawka deh ral a nih theih nan ram pawna thawn chhuah tlak leh thawn chhuah tham thar chhuah a pawimawh thu sawiin, APEDA kal tlanga remchang awm chu chhawr ṭangkai tum turin kut hna thawktu pawl hrang hrang ai awhte leh thil siam chhuaktute chu a chah a ni.

He hunah hian Ministry of Commerce & Industry hnuaia APEDA Delhi-a Deputy General Manager Pu Bidyut Kumar Baruah chuan inlawmna thu sawiin, Lunglei Sub-Deputy Commissioner Pi Lalrampari'n training buatsaih a nih dan a sawi a. Ministry of Agriculture & Farmers Welfare hnuaia Directorate of Marketing & Inspection (DMI) Guwahati-a Marketing Officer Pu Ashok Yadav chuan thei leh thlai thar chhuah leh sawngbawl sa hralh leh deh ral kawnga sawrkar ruahmanna hrang hrang - Integrated Scheme for Agricultural Marketing (ISAM), AGMARK leh Internship Scheme chungchang te a zirtir a. APEDA Tripura-a Business Development Manager Pu Joydev Roy chuan ram pawna thei leh thlai (agri-horti product) thawn chhuah chungchanga APEDA mawhphurhna leh APEDA kal tlanga sum leh paia ṭanpuina awm theite a sawi fiah a. Zawhna leh chhanna leh sawi hona hun hman a ni bawk.

He hunah hian Lunglei District ODOP (One District, One Product) thei - balhla bakah, sawhthing, hmarcha, serthlum, nuhnun (thingfanghma) leh dragonfruit te chu thlur bing niin, ram pawna thawn chhuah tham thar chhuak tur leh dah ṭhat rei theih tura sawngbawl kawnga hmasawnna tur kawng hrang hrangte zir ho a ni.