1800/2024-2025

2024 Thlazing ni 28: Vawiin khan Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm.

Chairman Pu R. Lalṭhazuala chuan member-te lawmna thu sawiin, banker-te chu mipui rawngbawl an nih hre reng tur leh mipuite'n bank kal tlanga hamṭhatna scheme hrang hrang awmte chiang taka an hriat theih nan Financial Literacy Campaign pawh uar zual sauh sauh turin a chah a. Cyber crime chungchang pawh mipuite hnena a tam thei ang ber puanzar tum tura chahin, sawrkar line department hrang hrangte nena thawk ho thiam turin a chah bawk a ni.

He ṭhut khawmah hian Lead District Manager Pu R. Lalmalsawma leh Manager & Lead District Officer RBI Aizawl Pi Ruth Paumunmuang te bakah, bank hrang hrang te, line department te, Sub-Headquarters YMA leh Sub-Headquarters MHIP ai awhte an tel a ni.

He hunah hian DCC meeting hmasa meeting minute chu pawm a ni a. Kum 2024 April thla aṭanga June thla (1st Quarter, 2024-25) chhunga Lunglei District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

He hunah hian zero balance-a account hawn theihna Pradhan Mantri Jan Dhan Yojana (PMJDY) leh Social Security Scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), etc. te thlir ho niin, he'ng scheme-ah te hian hma sawnna hmuh a nih thu tar lan a ni a. Lunglei District-ah 1st Quarter 2024 chhungin bank-te'n Credit/Deposit Ratio 71.66% an nei tih tar lan a ni a. Lunglei District chhunga bank-te'n loan an pek chhuah dan tur Annual Credit Plan (ACP) ruahman aṭangin bank-te hian Priority Sector hnuaiah 39.29% leh Non-Priority Sector hnuaiah 183.74% loan an pe chhuak tawh a. Self Help Group 11 hnenah ₹ nuai 21 loan pek chhuah niin, KCC hnuaiah crop loan ₹ nuai 1,018.23; Animal Husbandary loan ₹ nuai 585.33 leh Fishery loan Rs nuai 2.25 pe chhuakin, kum 2024-2025 chhungin mi 48 hnenah PMEGP loan ₹ nuai 176.05 pek chhuah a ni bawk a. Mizoram Rural Bank-in khaw hrang hrangah Financial Literacy Campaign vawi 11 an neih thu tar lan a ni bawk.

He ṭhut khawmah hian bank sum vawn himna (security) lam leh pawisa leng vel (currency management & remittance) chungchang sawi ho ni bawkin, bank zawng zawnga awm ngei ngei tur Security Guard, CCTV, Fire Extinguisher leh Security Alarm te chu ngaih pawimawh ni se tih a ni bawk.