673/2025-2026

Lunglei, 2025 Ṭomir thla ni 30: Vawiin khan Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu Additional Deputy Commissioner Pi Zoramdini hovin Lunglei DC Conference Hall-ah an ṭhu khawm.

He ṭhut khawmah hian Lead District Manager Pu R. Lalmalsawma, RBI Aizawl Lead District Officer leh NABARD Lunglei District Development Manager (DDM) te bakah, bank hrang hrangte, line department-te leh Sub-Headquarters YMA ai awhte an tel a ni.

He hunah hian kum 2025 January aṭanga March thla (4th Quarter, 2024-25) chhunga Lunglei District-a bank hrang hrangte hna thawh thlir let niin, hmasawnna tur hrang hrangte sawi ho a ni a. Kum 2025-2026 sawrkar kum chhunga Lunglei District chhunga bank-te'n loan an pek chhuah dan tur ruahmanna, Annual Credit Plan (ACP) chu tlangzarh nghal a ni bawk.

He hunah Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) te thlir ho niin, PMJJBY-a inziak lut thei mi 64,196-ah mi 13,501 (21.03%) leh PMSBY-a inziak lut thei mi 1,06,542-ah mi 30,832 (28.94%) inziak lut an awm thu leh Atal Pension Yojana (APY)-a inziak lut mi 1,931 an awm thu tar lan a ni a. Lunglei District-ah 4th Quarter 2024-25 chhungin bank-te'n Credit/Deposit Ratio 72.02% an nei tih tar lan niin, 3rd Quarter CD Ratio 71.69% aia a punna chu 0.33% a ni.

Lunglei District chhunga bank-te'n loan an pek chhuah dan tur Annual Credit Plan (ACP) ruahman aṭangin bank-te hian Priority Sector hnuaiah 86.56% leh Non-Priority Sector hnuaiah 137.52% loan an pe chhuak tawh a. Kisan Credit Card (KCC) hnuaiah crop loan cheng nuai 2,960.96, Animal Husbandary loan cheng nuai 1,968.94 leh Fishery loan cheng nuai 4.50 pek chhuah niin, mi 204 hnenah PMEGP loan cheng nuai 697.66 pek chhuah a ni a, heti hian PMEGP bikah kum 2024-2025 target cheng nuai 197.28 chu khumin, 353.64% pek chhuah a ni a. Bank hrang hrangte'n Financial Literacy Campaign vawi 28 an neih thu leh mi 1,261-in an chhim thu tar lan a ni bawk.

He ṭhut khawmah hian bank sum vawn himna (security) lam leh pawisa leng vel (currency management & remittance) chungchang sawi ho ni bawkin, bank zawng zawnga awm ngei ngei tur Security Guard, CCTV, Fire Extinguisher leh Security Alarm te chu ngaih pawimawh ni se, tih a ni bawk.