674/2025-2026

Lunglei, 2025 Ṭomir thla ni 30: Vawiin khan Mizoram sawrkara Health & Family Welfare Minister Pi Lalrinpuii chuan Government J. Buana College (GJBC) Multipurpose Hall-ah GJBC Class of 2025 Valedictory Day chu khuallian niin a hmanpui.


Khuallian Pi Lalrinpuii chuan tun hnai maiah Mizoram chu ziak leh chhiar thiam vek state - fully literate state-ah puan a nih thu tar langin, hei hian Mizote hi mi inzir mi, zirna lamah chuan hnam dang ai maha sang kan ni tih a tilanga a hriat thu a sawi a. Government J. Buana College-ah pawh college zir chhuak mai tur zirlai fel leh thiam tak tak an awm chu chhuanawm a tih thu sawiin, anmahni tan leh chhungkaw tana rin tlak, rin ngam ni a, hlawhtlinna tluantling nei thei tura taima taka bei zel turin a fuih a. Zirlaite chu zir kual dum a, thiam nial nual ni lo va, chhawr tlak thiamna paw chhuak ngei tura inzir tur leh eng hna pawh thawh zah leh thawh hreh nei lo turin a fuih a. Mizoram chu ruihhlo leh HIV/AIDS-in a run mek tih tar langin, theih tawp chhuaha ruihhlo do tur leh mipat hmeichhiatna kawnga inthiar fihlim turin a chah bawk a ni.

H&FW Minister Pi Lalrinpuii chuan mi rethei leh harsa zawkte hmakhua ngaiin sawrkarin hma lakna tam tak a kalpui tih sawiin, thihna tuar an awma ruang phurh pawh sawrkarin a kut ken tawh tih a sawi a. Damloh nikhuaa puk chawp leh a ba thlaa damdawi in aṭanga inkhul chhuak ṭhinte tan pawh pawisa chawi ngai miah lova an inenkawl theih dan tur - Mipui Healthcare (MUHCS) chu sawrkarin a duang chhuak tih tar langin, a hlawkpui ber tur chu mipuite an nih thu a sawi.

Govt J. Buana College Valedictory Day 2025 hi Lunglei Municipal Council (LMC) Vice Chairman Pu K. Lalrinawma leh Mizoram University-a College Development Council Director ⁠Prof. Lalbiakdiki Hnamte te pawhin an hmanpui a. Vanlalpekhlua (Department of Public Administration) chu 'Valedictorian' niin, Vanlalpekhlua (Department of Public Administration) leh K. Vanlalruata (Department of English) te hnenah 'Best Library User Award' hlan a ni.

Govt J. Buana College hi August ni 26, 1983 khan din niin, tunah hian zirlai 375 leh zirtirtu (faculty) 33 an awm mek a. Department hrang hrang pakua - Commerce, ⁠Economics, ⁠Education, ⁠English, Geography, History, ⁠Mizo, ⁠Political Science leh ⁠Public Administration te awmin, kumina zir chhuak tur (final semester) zirlai 114 an nei a ni.

Attachment

  • Loading attachment...