4076/2024-2025

Lunglei, 2025 Ramtuk thla ni 4: Vawiin khan Lunglei District Election Officer Pi Navneet Mann chuan a hna thawh pindanah PWD, P&E, PHED, MPRO, NHIDCL, BSNL, Airtel leh Jio ai awhte a ṭhut khawmpui a. Lunglei District-a village council (VC) leh local council (LC) inthlan buatsaih turah tluang taka inthlan kalpui a nih theih nan kawng, eng, tui leh inbiak pawhna lamah harsatna a awm lohna tura hma lak dan tur an sawi ho.

Pi Navneet Mann chuan February ni 12, 2025-a VC leh LC inthlan buatsaih turin inthlan buaipuitu tur polling party-te'n an duty-na hmun ṭheuh tluang taka an thlen theih nan kawng enkawltu PWD leh NHIDCL te chu hma la tura chahin, a bik takin February ni 11 - 14, 2025 chhungin kalkawngah khaihlak a awm loh nan kawng laih leh siam chungchangah a ṭul anga ruahmanna siam turin a chah a. P&E hotute chu polling station tinah eng an neih theih nan leh inthlan leh vote chhiar hunah eng a khaihlak loh nana hma la tura chahin, PHE hotute chu polling station tinah tui thianghlim hnianghnar tak pek a nih theih nan hma la turin a chah bawk a. Inbiak pawhnaah harsatna a awm loh nan service provider - BSNL, Airtel leh Jio lamte chu hma la turin a chah bawk a ni.