4174/2024-2025

Lunglei, 2025 Ramtuk thla ni 10: February ni 12, 2025-a Lunglei District-a village council (VC) leh local council (LC) inthlanpui buatsaih tura mawhphurhna hrang hrang chelhtu, nodal officer-te chu vawiin khan District Election Officer Pi Navneet Mann hovin a hna thawh pindanah an ṭhu khawm a. Inbuatsaihna kal mek thlir hovin, felfai leh tluang taka inthlan kalpui a nih theih nana ruahmanna hrang hrang an sawi ho.

He hunah hian nodal officer-te chuan an hma lakna report pein, inbuatsaihna tluang taka kalpui a ni tih tar lan a ni a. Inthlan buatsaih thei turin ruahmanna pawh siam fel niin, tluang takin inthlan buatsaih theih a nih beisei a ni a. VC leh LC hrang hranga inthlan huaihawttu leh buaipuitu turte chuan naktuk, February ni 11, 2025 (Thawhlehni) zing dar 6:00 aṭangin an duty-na tur hmun an pan ṭan dawn a ni.

Lunglei District-a VC 88 leh LC 24 awmah VC pahnih (seat 3 ve ve awmna) - VC02058-Sailen leh VC02065-Sumasumi-ahte chuan inthlan chuhtu awm chhunte chuh buaitu an awm loh avangin vote thlak ngai lova tlinga puan an ni a. VC 86 leh LC 24-ah, seat 486 (general seat 356 leh reserved seat 130) atan inthlan hi buatsaih a ni dawn a. VC 85 leh LC 24-ah chuan ruahman sa angin February ni 12, 2025 (Nilaini) zing dar 7 leh tlai dar 4 inkarah vote thlak a ni dawn a. VC02030-Lalnutui-ah erawh chuan vanduaithlak takin VC candidate thi a awm avangin State Election Commission (SEC) chuan ruahmanna thar siamin, February ni 13, 2025 (Ningani) zing dar 7 leh tlai dar 4 inkarah vote thlak a ni thung ang.