2004/2025-2026

Lunglei, 2025 Mimkut thla ni 4: Vawiin khan District Institute of Education and Training (DIET) Lunglei chuan Lunglei Convention Centre Conference Hall-ah Zirtirtute Ni (Teachers' Day) pualin hun an hmang.

DIET Lungleia Bachelor of Education (B.Ed) III Semester zirlai, C. Lalrinkima chuan hunserh a hmang a. Principal Pi Lalremruati Fanai chuan zirtirtute pawimawhna leh mawhphurhna hrang hrang sawiin, DIET Lungleia zirtirtute leh zirtirtu ni tura inzir mekte chu zirtir hna chu rawngbawlna pawimawh tak a nih anga ṭhahnem ngai taka thawk turin a fuih a. DIET Lungleia zirlaite aṭangin zai, lam, lemchan leh item chi hrang hrang ngaihthlak leh thlir ho a ni a. Zirtirtute hnenah thilpek leh lawmman sem niin, zirtirtute aṭangin thu sawi ngaihthlak a ni bawk.

He hunah hian DIET Lungleiin August ni 26, 2025-a Lunglei Municipal Council (LMC) huam chhunga high school zirlaite tana "Zirtirtu Ṭha" tih thupui hmanga thu inziahsiak, 'Essay Writing Competition' an buatsaiha lawmmante sem nghal a ni a. Essay inziahsiakah hian Vanhmingsangi (One Heart Academy) chu pakhatna niin, pahnihna LH Laltleipuii (Holy Faith School) leh pathumna Nathan R. Zochampuia (Sacred Heart School) te an ni a. Mi pasarih hnenah consolation prize pek a ni bawk.