1113/2026-2027

Lunglei, 2026 Nikir thla ni 22: Vawiin chawhma khan Lunglei District AIDS Prevention & Control Committee (DAPCC) chu an Chairman, Lunglei District Bawrhsap Pi Navneet Mann kaihhruaiin Lunglei DC Conference Hall-ah an ṭhu khawm a. Mission AIDS Suraksha (MAS) kalpui mek thlir hovin, Red Ribbon Quiz Competition 2026 buatsaih tur chungchang an sawi ho.

Member Secretary, District AIDS Control Officer Dr K. Lalhmachhuana'n thu ngaihtuah tura chhawp chhuahte a sawi zau va. DISHA Cluster Programme Manager (CPM) Dr Zodinpuii Hrahsel chuan powerpoint presentation hmangin Mission AIDS Suraksha (MAS) kalpui meka Lunglei District dinhmun tlangpui  tar langin, hma lakna kal mek leh hmachhawpte a sawi fiah a. Hlawhtling taka MAS kalpui a nih theih nana rawtna leh ruahmanna hrang hrang sawi ho niin, Red Ribbon Quiz Competition 2026 atana thil ṭul leh ruahmanna hrang hrang sawi ho a ni bawk.

Bawrhsap Pi Navneet Mann chuan MAS chu HIV/AIDS darh zel tur venna leh HIV veite’n an dinhmun an hriat chian a, enkawlna ṭha tak an dawn theihna tura Ministry of Health & Family Welfare hma lakna thar a nih thu sawiin, Lunglei District-ah hlawhtling taka kalpui a nih theih nan Department hrang hrangte chuan thawh hona ṭha tak nen an tih tur ṭheuhte hlen chhuah tum turin a chah a. HIV ven leh enkawl chu hma lakna pawimawh tak a nih thu leh HIV/AIDS kaihhnawiha hma laknaah Lunglei District-a thawktute chuan an thawk ṭha thawkhata a hriat thu sawiin, Lunglei District chu ram dang nena inramri a nih angin fimkhur leh nasa zawka ṭan lak a ṭul thu a sawi a. Quiz Competition chu zirlaite zinga HIV/AIDS chungchang inzirtirna hmanraw ṭha tak a nih thu sawiin, sikul a tam thei ang ber an tel theih nan thawktute leh zirtirtute chu ṭan la turin a chah.

Mission AIDS Suraksha hnuaiah hian Lunglei District-ah 95:95:99 tihlawhtling turin hma lak mek a ni a. 95:95:99-in a tum chu HIV vei (people living with HIV: PLHIV) 95% talin an nihna an inhriat theihna tura zau zawka thisen endik (test) kalpui te, HIV hrik pai 95% talin Antiretroviral Therapy (ART) ṭha taka an lak theih nana hma lak leh ART latu 99% talin an ṭhatpui a, mi dang kai chhawng thei lo khawpa viral load hniam an neih theih nana hma lak te a ni a. Lunglei District hian 1st 95-ah target 1,668 neiin, May 2026 khan 1,418 (85%) an tihlawhtling a; 2nd 95-ah target 1,418 aṭangin 1,250 (88.2%) tihlawhtlingin, 3rd 99-ah taget 1,110 aṭangin 1,053 (94.9%) an tihlawhtling thung a. MAS target tihlawhtling tur hian zirna in leh sawrkar pisa a tam thei ang berah HIV/AIDS chungchang inzirtirna leh endikna (awareness campaign & screening) kalpui bakah, Healthy Lunglei District Campaign hnuaia hma laknaa HIV endik tel te, tlawmngai pawl (NGO) hrang hrang leh kohhrante nena thawh ho te ruahman leh kalpui mek a ni.

Ṭhalai kum 13-17 inkarte zingah HIV/AIDS leh STI/RTI chungchang inzirtirna atan pawl 8, pawl 9 leh pawl 11 zirlaite tan Red Ribbon Quiz Competition kalpui leh tur niin, Lunglei District Level Red Ribbon Quiz Competition hi July 30, 2026-ah School Education Conference Hall, Lungleiah buatsaih ni se, tih a ni a. School level-ah sikul ai awh zirlai pahnih ṭheuh telin, online-in intihsiakna kalpui phawt a ni ang a. Sikul ti ṭha zual 10 chuan district level inelna hmachhawnin, district level-a pakhatna hian state level competition-ah district ai a awh ang a. Regional leh national level thlengin intihsiakna hi buatsaih a ni ang.