1967/2026-2027

Lunglei, 2026 Thlazing ni 28: Vawiin khan Lunglei District AIDS Prevention & Control Committee (DAPCC) chu an Chairman, Lunglei District Bawrhsap Pi Navneet Mann kaihhruaiin Lunglei DC Conference Hall-ah an ṭhu khawm a. Mission AIDS Suraksha (MAS) kalpui meka Lunglei District dinhmun thlir hovin, Intensified IEC Campaign 3.0 hnuaia HIV/AIDS chungchang inzirtirna beihpui thlak dan tur an sawi ho.

Member Secretary, District AIDS Control Officer Dr K. Lalhmachhuana'n thu ngaihtuah tura chhawp chhuahte a sawi zau va. Lunglei District Sahyogi Pi Melody Remsangpuii chuan powerpoint presentation hmangin Mission AIDS Suraksha (MAS) kalpui meka Lunglei District dinhmun tlangpui tar langin, hma lakna kal mek leh hmachhawpte a sawi fiah a. District Integrated Strategy for HIV/AIDS (DISHA), Lungleia Data Monitoring and Documentation Officer (DMDO) Pu K. Lalvensanga chuan powerpoint presentation hmangin Intensified IEC Campaign (IIECC) Phase 3 kalpui dan tur ruahmanna hrang hrang a tar lang a. Hlawhtling taka MAS leh IIECC kalpui a nih theih nana rawtna leh ruahmanna hrang hrang sawi ho a ni.

Bawrhsap Pi Navneet Mann chuan MAS kal tlanga HIV/AIDS veite'n an dinhmun an hriat chian a, enkawlna ṭha tak an dawn theihna tura hma lakna chu HIV/AIDS darh zel tur venna atana pawimawh tak a nih thu sawiin, Lunglei District-a hlen chhuah tur target-te a hma thei ang bera hlen chhuah tum turin thawktute a chah a. IIECC hnuaia tih tur ruahmante pawh a hun takah ṭha taka tihhlawhtlin a nih theih nan thawktute chu theih tawp chhuah tura chahin, Department hrang hrang leh a kaihhnawih pawl hrang hrangte'n thawh hona ṭha tak nen Lunglei District-a HIV/AIDS kaihhnawiha hma lakna hlawhtling tak a awm theih nan ṭan la zel turin a chah.

Mission AIDS Suraksha hnuaiah hian Lunglei District-ah 95:95:99 tihlawhtling turin hma lak mek a ni a. 95:95:99-in a tum chu December ni 1, 2026 hmaa HIV vei (people living with HIV: PLHIV) 95% talin an nihna an inhriat theihna tura ngawrh leh kim zawka thisen endik (test) kalpui te, HIV hrik pai 95% talin enkawlna Antiretroviral Therapy (ART) ṭha taka an lak theih nana hma lak leh ART latu 99% talin an ṭhatpui a, mi dang kai chhawng thei lo khawpa viral load hniam an neih theih nana hma lak te a ni a. Lunglei District hian First 95-ah target 1,668 neiin, July 2026 khan 1,404 (84%) an tihlawhtling a; Second 95-ah target 1,404 aṭangin 1,249 (89%) tihlawhtlingin, Third 99-ah taget 1,111 aṭangin 1,051 (95%) an tihlawhtling thung.

MAS target tihlawhtling tur hian sawrkar pisa, zirna in leh khualzin phur lirthei khalhtute zingah HIV/AIDS chungchang inzirtirna leh endikna (awareness campaign & screening) kalpui bakah, Healthy Lunglei District Campaign hnuaia hma laknaa HIV endik tel te, tlawmngai pawl (NGO) hrang hrang leh kohhrante nena thawh ho te ruahman leh kalpui mek a ni.

IIECC 3rd Phase hi Lunglei District-ah September leh October, 2026 chhungin ngawrh taka kalpui tura ruahman a ni a. He campaign kal tlang hian Lunglei District chhunga khaw thlan bik 25-ah HIV/AIDS leh mipat hmeichhiatna (sex) aṭanga natna inkai chhawn theih, Saihri (Syphilis) chungchang inzirtirna leh thisen endik (HIV test) runpui kalpui tum a ni a. Mipui vantlang zingah leh zirna in thlan bik 41-ah te inzirtirna kalpui a nih bakah, in tin tlawh chhuakin thawktute'n HIV/AIDS chungchang inzirtirna thuziak an sem ang a. Red Ribon Club awmna college 7-ah Awareness Campaign & HIV Screening buatsaih niin, Civil Hospital Lunglei leh Sub-District Hospital Tlabungah te Health Camp & HIV Screening buatsaih a ni dawn bawk a. Department hrang hrang, damdawi in, zirna in, village/local council leh tlawmngai pawl te nen ṭang kawpin ngawrh taka hma lak tum a ni.