DIRECTORATE OF INFORMATION & PUBLIC RELATIONS, Government of Mizoram, India

4736/2024-2025

Lunglei, 2025 Vau thla ni 20: Lunglei District Environment Plan (DEP) hman lai chu siam ṭhat (update) a hun tawh avangin a siam ṭhat dan tur sawi hovin a kaihhnawih department hrang hrang hotute chu vawiin khan Lunglei District Bawrhsap Pi Navneet Mann hovin a hna thawh pindanah an ṭhu khawm a. Mizoram Pollution Control Board (MPCB) lam ai awhte'n google meet kal tlangin an chhim bawk.

Chairman Pi Navneet Mann chuan District Environment Plan hman meka bawlhhlawh chi hrang hrang sawngbawl dan leh thehthang dan tur ruahmanna leh department hrang hrang mawhphurhna tlangpui a tar lang a. Additional Deputy Commissioner Pi Rochuangkimi Khenglawt chuan Lunglei DEP siam ṭha turah state level committee-in a ngaih pawimawh leh kaihhruaina a siam hrang hrangte a tar lang bawk a. Lunglei DEP siam ṭhat nana thil pawimawh hrang hrang sawi ho zui a ni.

DEP-ah hian bawlhhlawh sakhat (solid waste), bawlhhlawh tuiril (liquid waste) leh sarang lam chi bawlhhlawh (plastic waste) sawngbawl dan tur te, in chhung tuichhia leh inthiarna (sewerage) thli, damdawi in (biomedical) thli, thil siamna hmunpui (industry) thli leh lung lakna leh thil laih chhuahna (mining) thli sawngbawl dan tur te, tui leh boruak thianghlimna tur leh thawm bengchheng leh bawlhhlawh chi hrang hrang titlem tura ruahmannate a tel a. Lunglei DEP siam ṭhat nana department hrang hrangte tih tur chin hriattirna chu DC office aṭanga sem chhuah niin, March ni 28, 2025 hmain department hrang hrang aṭangin mahni kaihhnawih data pawimawh leh ruahmannate chu DC office-ah theh luh kim ni se, tih a ni.

He hunah hian Lunglei District faina leh thianghlimna tur te, chhehvel leilung leh boruak thianghlimna tur tea ṭan lak a pawimawhzia sawi ho niin, boruak bawlhhlawh zel tur ven nan mipuia inzirtirna leh khawpui boruak thianghlim zawng tehna (air quality index) puanzar te, a zing thei ang bera lirthei khu chhuah endik te, khawlaia bawlhhlawh hal chu danin a khap angin hal an awm loh nana thuneitute aṭanga hma lak pawimawhna te sawi ho a ni bawk.

Attachment