4796/2024-2025

Lunglei, 2025 Vau thla ni 24: Vawiin khan Lunglei District Level Committee on Disability chu an Chairman, District Bawrhsap Pi Navneet Mann kaihhruaiin Lunglei DC Conference Hall-ah an ṭhu khawm.

Bawrhsap chuan hun tepter tak karah Lunglei District chhunga vohbik, person with disabilities (PwD) survey ṭha taka zawh theih a ni chu lawmawm a tih thu sawiin, he survey-a tha thawhtu zawng zawng chungah lawm thu a sawi a ni.

He hunah hian kumin January - March thla chhunga Lunglei District chhunga vohbik, PwD-te dinhmun zir chianna (survey) report thlir ho niin, vohbikte tana hma lak zel dan tur leh an tana hamṭhatna leh ṭanpuina awm theite sawi ho a ni a. DC Lunglei ruahmannaa District Social Welfare Office te nen ṭang kawpa Lunglei District-a vohbikte chawi kanna tur hma lakna - Project LEAP (Lunglei’s Empowerment for Access and Equity for all Persons) kalpui tur chungchang sawi ho ni bawkin, Project LEAP hnuaiah hian vohbikte hamṭhatna awm thei zawng zawngte mipui hnena puanzar leh hamṭhatna awlsam zawka an hmuh theihna tura hma laksak te, vohbikte tana special health camp buatsaih te, an mamawh hmanruaa ṭanpuina bakah, khawsakna leh ei zawnna tur ngaihtuahsak thlengin hma lakpui tum a ni.

Lunglei District-a PwD survey buaipui tur hian nikum, 2024 December thla khan  khua/veng tinah Village/Local Level Survey Committee din niin, an huam chhung ṭheuhvah survey hna an kalpui a. Lunglei Municipal Council  area-ah District Social Welfare & Tribal Affairs Officer kaihhruaina hnuaiah leh Rural Development Block huam chhungah chuan BDO te kaihhruaina hnuaiah survey hi kalpui a ni.

Persons with Disabilities (PwDs) Survey Report  aṭanga a lan danin,  Lunglei District chhungah vohbik mi 1,262 an awm a. An zinga mi 443 chuan Disability Certificate/Unique Disability ID (UDID) neiin, Disability Certificate/UDID la nei lo mi 819 an awm thung a. Disability Certificate/UDID nei zinga a tam zawk (mi 293) chu Lunglei Municipal Council area chhunga chengte an ni a, UDID nei dang mi 150 te chu LMC pawn lam RD Block pali - Lunglei, Bunghmun, Lungsen leh Tlabung RD block huam chhunga cheng an ni thung.

He hunah hian vohbikte'n Disability Certificate/UDID an neih mumal loh avanga ṭanpuina dawn kawnga harsatna an tawh ṭhin thu tar lan a ni a. Committee chuan UDID la nei lote chu a ṭul anga assessment camp buatsaihsak te, vohbikte office leh mipui pun khawmna hmuna awlsam zawka an veivah theih nana ruahmanna awm dan endikna (accessibility audit) kalpui leh vohbikte tana hamṭhatna awm theite  zawn chhuah a, hma laksak te a rel a ni.