4103/2024-2025

Lunglei, 2025 Ramtuk thla ni 5: Vawiin khan Lunglei District Level Committee on Fire Prevention (DLCFP) chu Lunglei District Additional Deputy Commissioner Pi Rochuangkimi Khenglawt hovin Lunglei PWD Conference Hall-ah an ṭhu khawm a. Ram kang ven kawnga hma lak dan tur hrang hrang an sawi ho.

Lunglei DLCFP Member Secretary, Lunglei Forest Division-a Divisional Forest Officer (DFO) Pu Lalduhthlana hnen aṭangin kum hmasa lama hma lak dan report ngaihthlak a ni a. Kum 2024 chhungin VC leh YMA te nen ṭang tlangin ram kang/kangmei ven chungchang inzirtirna kalpui ṭhin a ni a; sawrkar pisa hrang hrangah kangmei veng tur leh fimkhur tura intiamna sawi rual a ni a; hmun pawimawh leh langsar laiah te inzirtirna thuziak tar niin, kohhran hun hmannaah thu chhiar chhuah tur te pek a ni a. Print/electronic/social media kal tlang te'n inzirtirna hrang hrang theh darh a ni bawk.

DFO report-a tar lan a nih danin kum 2024 chhung khan Lunglei District-ah ram kang ṭum 12 thlengin, hectare 29.95-a zau a kang a. Khawtlanga chhiat tawh avanga lo hal hun bawh pelh khaw 2 tih loh chuan sawrkar thupek angin March ni 15 hmain lo an hal hman vek a ni.

Kumina kangmei ven kawnga hma lakna tur hrang hrang zingah, "Kangmei ven hi kan tu leh fate hmakhua atan a ni" tih thupui hmanga February ni 10 - 15, 2025 chhunga hman tur Kangmei Ven Hapta (Fire Prevention Week) 2025 hawnna chu February ni 10 chawhma dar 11-ah Govt J. Buana College Auditorium, Lungleiah buatsaih ni se, tih a ni a. He huna Khuallian tur hian Lunglei District Bawrhsap Pi Navneet Mann chu beisei a ni a. Hun hman dan tur kimchang chu Chairman rawnin EF&CC department-in lo ruahman se, tih a ni.

Kumin ṭhal chhung hian Lunglei District chhunga kangmei venna lam inzirtirna (awareness campaign) uar zawka buatsaih leh tura ruahman niin, media kal tlanga sawi hona, thuchah leh inzirtirna hrang hrang tihchhuah te, sawrkar pisaa thu tiam te, kohhran inkhawma thu puantir te, vantlang tlangau hmanga inzirtirna puan leh lemchan tawi (reel) insiamsiak leh intihsiakna dang buatsaih te tum a ni.

Kangmei ven kawnga thawk ṭha khuate chawimawina 'Village Level Fire Prevention Award 2025' chu kumin pawh hian siam leh tum niin, a thlangtu tur committee din a ni a. State Level Committee-in lo hal theih hun chhung a bituk March ni 15 chu Lunglei District-ah pawh zawm tur niin, a ṭul angin hriattirna tihchhuah ni se, tih a ni a. Kangmei chhuak palh thei ven nan silai kenga ram vah khapna chu District Magistrate aṭangin chhuah a ni bawk ang.