4328/2025-2026

Lunglei, 2026 Ramtuk thla ni 6: Vawiin khan Lunglei District Level Committee on Fire Prevention (DLCFP) chu Lunglei District Additional Deputy Commissioner Pi Zoramdini hovin Lunglei DC Conference Hall-ah an ṭhu khawm a. Ram kang ven kawnga hma lak dan tur hrang hrang an sawi ho.

Lunglei DLCFP Member Secretary, Lunglei Forest Division-a Divisional Forest Officer (DFO) Pi Lawmnapari hnen aṭangin kum hmasa lama hma lak dan report ngaihthlak a ni a. Kum 2025 chhungin VC/LC leh YMA te nen ṭang tlangin ram kang/kangmei ven chungchang inzirtirna kalpui ṭhin a ni a; sawrkar pisa hrang hrangah kangmei veng tur leh fimkhur tura intiamna sawi rual a ni a; hmun pawimawh leh langsar laiah te inzirtirna thuziak tar niin, kohhran hun hmannaah thu chhiar chhuah tur te pek a ni a. Print/electronic/social media kal tlang te'n inzirtirna hrang hrang theh darh a ni bawk.

Kumina kangmei ven kawnga hma lakna tur hrang hrang zingah, "Nungchate chenna leh tui thianghlim min petu ramngaw kangmei lakah venghim rawh" tih thupui hmanga February ni 9 — 13, 2026 chhunga hman tur Kangmei Ven Hapta (Fire Prevention Week) 2026 hawnna chu February ni 9 chhun dar 12:30-ah Lunglei Convention Centre-ah buatsaih ni se, tih a ni a. He huna Khuallian tur hian Lunglei District Superintendent of Police Pu J. Lalmuankima chu beisei a ni a. Hun hman dan tur kimchang chu Chairman rawnin EF&CC department-in lo ruahman se, tih a ni.

Kumin ṭhal chhung hian Lunglei District chhunga kangmei venna lam inzirtirna (awareness campaign) uar zawka buatsaih leh tura ruahman niin, media kal tlanga sawi hona, thuchah leh inzirtirna hrang hrang tihchhuah te, sawrkar pisaa thu tiam te, kohhran inkhawma thu puantir te, vantlang tlangau hmanga inzirtirna puan te, chanchinbua kangmei venna lam hawi thu chhuah ṭha lawmman pek te, lemchan tawi (reel) insiamsiak leh intihsiakna dang buatsaih te tum a ni.

Kangmei ven kawnga thawk ṭha khuate chawimawina 'Village Level Fire Prevention Award 2026' chu kumin pawh hian siam leh tum niin, a thlangtu tur committee din a ni a. Kangmei ven kawnga thawk ṭha khaw pathum tan State Level-ah lawmman siam a ni dawn bawk a. State Level Committee-in lo hal theih hun chhung a bituk March ni 15 chu Lunglei District-ah pawh zawm tur niin, a ṭul angin hriattirna tihchhuah ni se, tih a ni a. Hmunphiah chingtute tan March ni 31 thleng an hmunphiah hmun hal theih hun hawn a ni dawn thung a. Lo hal theih hun bituk bawhpelh an awm chuan an chungah dan anga khauh taka hma lak zui rel a ni bawk.