2003/2026-2027

Lunglei, 2026 Thlazing ni 31: Vawiin khan District Level Committee on Nasha Mukt Bharat Abhiyaan (NMBA), Lunglei District chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a. NMBA hnuaia kum 2026–27 chhung atana hma lakna tur ruahmanna, Annual District Action Plan an thlir ho.

Lunglei District Social Welfare Officer Pu C L Joseph chuan kum 2026–27 chhung atana ruihhlo dona kawnga hma lakna tur ruahmanna duan chhin, Draft Annual District Action Plan pharhin, a sawi fiah a. Annual District Action Plan hi Ministry of Social Justice & Empowerment ruahmanna thar zul zuia duan niin, Lunglei Municipal Council (LMC) huam chhung leh Lunglei District chhunga Rural Development Block pali te huam vek tura ruahmanna siam a ni a. Rawtna hrang hrangte sawi ho a nih hnuah Annual District Action Plan chu pawm a ni.

NMBA hi ruihhlo awm lohna rama India ram siam tura hma lakna a nih angin, ruihhlo hman sualna titlem tura hma lakna atan district level mai bakah, block leh village level-a hma lakna ṭha zawk a awm theih nan ruahmanna siam niin, hma lakna chak zawka kalpui turin Block tinah Block Drug Demand Reduction Committee din a, hma lak tum a ni a. Lunglei District chhunga khua za zela 25 (25%) tal ruihhlo awm lohna khua (drug-free village)-ah leh zirna in za zela 75 (75%) tal ruihhlo laka fihlim zirna in (drug-free school)-a siam turin hma lak tum a ni a. Thingtlang kilkhawr zawkah hma lakna tam thei ang ber kalpui tum niin, zirna in hrang hrang leh zirlaite zingah ruihhlo ṭhat lohzia inzirtirna leh intihsiakna hrang hrang te, khawtlang hruaitute, tlawmngai pawl leh kohhran hrang hrang nen ṭang hova ruihhlo dona kawnga hma lakna ngawrh taka kalpui te, infiamna te, themthiamna (art) hrang hrang – zai, lam leh lemziak te bakah, media hrang hrang kal tlanga inzirtirna kalpui te ruahman a ni.

Annual District Action Plan bakah hian, line department leh NGO kal khawmte'n ruihhlo ṭhat lohzia inzirtirna kawnga hma lak dan tur rawtna an neihte September ni 20, 2026 ral hmain District Level Committee-ah theh lut se, chu chu a ṭul anga bawhzui ni se, tih a ni bawk.