73/2026-2027

Lunglei, 2026 Ṭau thla ni 8: Lunglei District Level Committee on NCORD leh Nasha Mukt Bharat Abhiyaan ṭang kawp huaihawta naupang leh ṭhalaite zinga ruihhlo ṭhat lohzia inzirtirna peng khat atana "Ruihhlo Do" tih thupui hmanga Lunglei Municipal Council (LMC) huam chhunga kohhran hrang hrangte tana "Easter Egg Painting Competition" (Easter artui incheisiak) buatsaiha lawmmante chu vawiin khan Lunglei DC Conference Hall-ah sem a ni.

He intihsiakna hi naupang leh ṭhalaite zinga ruihhlo ṭhat lohzia inzirtirna leh ruihhlo laka fihlim tura infuih tharna atana ruahman niin, Easter Sunday, April ni 5, 2026 khan Lunglei khawpui chhunga kohhran hrang hrangah kalpui a ni a. Kohhran hrang hrang hian an kohhran member naupang leh ṭhalaite tan ruihhlo dona lam hawia artui incheisiak leh ruihhlo dona au hla chuanna placard insiamsiak hi huaihawtin, artui chei sa leh placard thlalak theh luh aṭangin lawmman dawng turte hi thlan chhuah an ni a. Vawiin khan lawmman hi a dawngtute kutah hlan a ni.

Lunglei District Bawrhsap Pi Navneet Mann chuan he intihsiakna hi Easter Sunday lawmna peng khat a nih bakah, Lunglei mipuite'n ruihhlo tel lova nun hlim leh hrisel an neih theih nana buatsaih a nih thu sawiin, intihsiakna tihlawhtlingtute chungah lawm thu a sawi a. Ruihhlo chu mihring taksa leh rilru ei chhetu bakah, sum khawh ralna leh chhungkua leh khawtlang tana hnawksak a nih thu sawiin, ruihhlo laka inthiar fihlim a, do tlat turin ṭhalaite leh District mipuite a chah.

Lawmman semna hun hi Lunglei Additional Deputy Commissioner Pi Zoramdini'n a kaihruai a. Sub-Deputy Commissioner Pi Lalhlimpuii Pachuau chuan intihsiakna report pein, lawmman dawngtute kutah Bawrhsap chuan lawmman pawisa fai leh certificate a hlan a. Sub-Divisional Police Officer Pu R. Lalthankima'n lawm thu sawiin hun a khar.

Lunglei District Easter Egg Painting Competition 2026-a lawmman dawngtute chu:

1st Prize: Malsawmzeli, PCI Chanmari (₹3,000/- + Certificate)

2nd Prize: Olivia Zorinzuali, BCM KNP Chanmari Unit (₹2,000/- + Certificate)

3rd Prize: Brianna Lalngaihawmi, PCI Chanmari (₹1,000/- + Certificate)

Special Mention (₹500/- + Certificate): Baby Malsawmzuali Fanai (UPC Luangmual), Alan VL Lawmkima (PCD Venglai), Lalruatzela (PCD Venglai), F. Lalhlupuii (UPC Ramthar), Lalruathlua (UPC Luangmual)