74/2026-2027

Dated Champhai, 8th April 2026: Tourism Minister Pu Lalnghinglova Hmar chuan vawiin khan Lal Mual, Vangchhiaah PRASHAD Scheme hnuaia sak tur Development of Basic Amenities lungphum a phum.

Minister Pu Lalnghinglova Hmar chuan Vangchhia khua chu engdang mahin pawlh dal lo tura a duh thu sawiin khualzin tu pawh lo kal sela, danglam vak tum lovin an nihna sa angin lo dawngsawng tawp turin a chah a, khualzin te hian a khaw mite nunphung an hmu duh thin tih sawiin an khua awm dan anga lo awm ve mai kha khualzinte tih thin dan a nih avangin anmahni lo danglam a ngaih loh thu a sawi.

Minister chuan Vangchhia khua in khualzin an hipna kawngah an khuain an hlawkpui a, riahpui theih tur ngaihtuah a tul thu a sawi a, chu lam kawngah chuan ngaihtuahna seng tura chahin Tourism Department pawhin theihtawp a chhuah tur thu sawiin culture based tourism kalpui a nih tur thu a sawi bawk.

Champhai District hi khualzin hipna hmun tha tak a nih thu leh nasa zawka khualzin hip zel tura tan lak an tum thu a tarlang a, Champhaiah Event lian buatsaih a nihin helam tlangdungah khualzin tam tak an kal theihna tur ruahmanna siam a nih tur thu a sawi a, chutiang atan chuan Development of Basic Amenities lungphum hi phum a nih thu a sawi a, riahchilh a tlawh duh tan pawh riahchilh theih turin hma an lak tur thu leh a hlawkpui tu ber tur chu Vangchhia an nih tur thu a sawi bawk.

Khualzinte'n Mizorama tlawh an duhte chu siamchawp ni lovin a awm sa hi en an duh thin tih a sawi a, Vangchhia pawhin Mizo te tana hmun pawimawh siamchawp ni lo an neih mek chu tihlar zel kawngah Tourism Department chuan theihtawp a chhuah tur thu a sawi a, Development of Basic Aminities lungphum a phum nghal a ni. Minister hian Kawtchhuah ropui a tlawh nghal a ni.

Pu Lalmuanpuia Punte, Adviser to CM pawhin thusawiin, sawrkar in nasa takin Tourism lamah hma a la mek a, khualzin tam takin Mizoram an tlawh mup mup mek tih a sawi a, Culture Tourism lam kalpui a tul thu leh Tourism Minister pawh helam kawngah tan nasa taka a la chu lawmawm a tih thu a sawi.

Development of Basic Amenities hi PRASHAD Scheme hnuaia Project niin Vangchhia Cultural & Heritage Centre tia hming vuahin cheng nuaih 547.32 hmanga sak tur a ni.