75/2026-2027

Saitual, the 8th April, 2026: Union Minister of State for Jal Shakti, Dr. Raj Bushan Choudhary chuan Saitual District a tlawh a, vawiin khan sawrkar department hotute leh khawtlang hruaitute kawmin, Sihfaa khuaa Jal Jeevan Mission (JJM) scheme hnuaia water reservoir sak te leh District Hospital te a tlawh bawk a ni.

Dr. Raj Bushan Choudhary chuan Saitual District-a sawrkar department hotute leh khawtlang hruaitute a kawm a, kalkhawmte chuan Union Minister of State hnenah an mamawhte leh an harsatna tawh te an thlen nghal a ni. Dr. Raj Bushan Choudhary chuan Saitual District-in kawng hrang hranga hma a lo sawn theihna tura pui turin a inhuam thu a sawi a, theih tawp a chhuah zel tur thu a sawi bawk. He thutkhawm hi District Bawrhsap Pu Srinivas Sadi chuan a kai hruai a, Department hrang hrang hna thawh te powerpoint hmangin a sawi zau bawk a ni.

Union Minister of State for Jal Shakti hian nimin khan Sihfa khuaa Jal Jeevan Mission hnuaia reservoir sak a tlawh a, he hunah hian Er. Lalpektluanga, Sr. EE, PHED leh Er. Lalzuala, SDO te chuan an lo dawng sawng a. Vawiin khan District Hospital tlawhin, Dr. Zothanpari Chhakchhuak, Dy. CMO chuan a lo dawng sawng bawk a ni.