1238/2024-2025

2024 Vawkhniahzawn thla ni 19: Vawiin chhun khan Lunglei District Level Coordination Committee (DLCC) on African Swine Fever (ASF) and Trans-boundary Animal Diseases (TADS) chu an Chairman, Lunglei District Bawrhsap Pu R. Lalṭhazuala hovin  Lunglei DC Conference Hall-ah an ṭhu khawm.

Bawrhsap Pu R. Lalṭhazuala chuan Mizoram District ṭhenkhatah African Swine Fever (ASF) hri leng mekin, Lunglei District chhungah pawh he vawk pul hri hlauhawm tak hi a leng mek tih sawiin, veng ṭhenkhat chu vawk pul hri lenna hmun (infected area)-ah puan hial a ni, a ti a. ASF punlun tur ven kawngah AH & Vety Department bakah, tlawmngai pawl leh line department hrang hrangte nena thawh hona ṭha tak kalpui a ṭul thu a sawi.

Lunglei District AH & Vety Officer Dr Vanlalhruaia chuan report pein, ASF hi March ni 20, 2021-ah Mizoramah a leng ṭan a, chuta ṭang chuan he natna hian Mizoram a chenchilh ta reng a ni, a ti a. Kum tin khaw lum ṭan hun velah ASF hi a lan chhuah ṭhin thu leh thlasikah a reh leh deuh ṭhin thu a sawi a. Tun hnaiah Mizoram hmun ṭhenkhatah ASF ni ngeia hriat lang chhuak hi kum hmasa lam nena khaikhin chuan a nasa lo hret a ni tiin, tun dinhmunah Lunglei District-ah vawk thi 72 leh vawk suat 45 a awm tawh thu a tar lang bawk.

He hunah hian SP, LMC, DRDO, CMO, DFO, UD&PA, DLAO leh LR&S official-te, LC/VC Association, Sub-Headquarters YMA, Sub-Headquarters MHIP, Headquarters MUP, Butcher Association leh Pig Farmers Association aiawhte an tel a. Task Force for Surveillance Zone leh Infected Zone ruat chungchang te, Infected Zone chhunga standard operating procedure (SOP) kalpui dan tur chungchang te, a hlawma vawk thi phumna hmun (mass grave/burial ground) chungchang te, khapna thupek kenkawh chungchang te, vawk thi phum lova paih an awma hremna lekkawh chungchang leh vawk kah hlum ngai a awma zangnadawmna pek chungchang te sawi ho a ni.