1239/2024-2025

Aizawl, the 19th July, 2024: Vawiin chawhnu khan Sports and Youth Services Minister Pu Lalnghinglova Hmar leh Union Sports Minister Pu Mansukh Mandaviya-te chu New Delhi-ah an inkawm.

Pu Lalnghinglova Hmar chuan India ramin kum 2036-a Olympics thlen a tumnaah Mizoram chuan tel ve ngei a duh thu leh Mizoramin Sports Conclave buatsaiha bul a tan tawh thu a sawi a. Hemi kawnga hmalakpui turin Union Sports Minister hi a sawm nghal a, Pu Mansukh Mandaviya hian project siama a rang lama thehlut turin thurawn a lo pe a ni.

Pu Lalnghinglova Hmar chuan, "State lian lo tak, mihring pawh tlemte awmna kan ni chungin India ramah sports avangin hriat kan hlawh a, state rethei zawk tan budget-ah sports hmasawnna tur dah tam a harsa si a, sorkar laipuiin min puih zel kan ngai a ni," tia a sawi chu Union Sports Minister chuan puih ngei a tiam bawk.

Mizorama zina sports hmasawnna tur a hmun ngeia sawi dun tura Pu Lalnghinglova Hmar sawmna chu Pu Mansukh Mandaviya chuan tihlawhtlin ngei a tum a, kumin chhung ngeia Mizoram tlawh a tum thu leh, Mizoramin 'Vision 2036 Olympics' a neih chu lawmawm a tih thu a sawi bawk. 

Union Labour Minister ni bawk Pu Mansukh Mandaviya leh Mizoram sawrkara LESDE enkawltu Pu Lalnghinglova Hmar te hi Labour Ministry hnuaia hamțhatna awmte hai chhuak tur leh chiang zawka indawr chhunzawm zel turin an inthlah bawk. 

Pu Lalnghinglova Hmar hi vawiin vek khan Union Sports Secretary Pi Sujata Chaturvedi nen inkawmin sports hmasawnna tura hmachhawp sorkar laipuia bawhzui ngaite a bawhzui bawk a ni.