2095/2025-2026

Lunglei, 2025 Mimkut thla ni 11: Vawiin khan Lunglei DC Conference Hall-ah Ministry of Tribal Affairs hnuaia tlang mi (tribal)-te hmasawnna tur leh vantlang thawh hona kal tlanga khawtlang hmasawnna a awm theih nana hma lakna tur, Aadi Karmayogi Abhiyan chungchang zir hona, 'District Level Orientation' buatsaih a ni.

Lunglei District Bawrhsap Pi Navneet Mann chuan hun kaihruaiin, Aadi Karmayogi Abhiyan hnuaia hma lak dan tur ruahmanna tlangpui a tar lang a. He hma lakna hnuaia khawtlang hmasawnna tur ruahmanna chu khaw mipuite nena duan tur a nih angin department hrang hrangin a bulṭhutah mawhphurhna pawimawh tak an neih thu sawiin, programme hlawhtlinna turin department hrang hrangte, khawtlang hruaitute, tlawmngai pawl leh mipuite nen thawh hona ṭha tak neih a pawimawh thu a sawi.

He hunah hian State Master Trainer, Lunglei District Programme Officer (WCD) Pu C. Lalnunfela'n Aadi Karmayogi Abhiyan chungchang a lem nen a sawi fiah a. District Master Trainer-te'n hriat tur pawimawh hrang hrang sawi bawkin, hlawhtling taka he programme hi kalpui a nih theih nana thil ṭul hrang hrang sawi ho a ni bawk.

Aadi Karmayogi Abhiyan – Responsive Governance Programme hi Viksit Bharat 2047, India Independence kum 100 tlinna tur tin zawn chunga ram hmasawn (developed country) nihna kawnga ram pum huapa chet chhuahna tur leh danglamna thlentu (change leader) mi nuai 20 chher chhuahna tur a ni a. Khaw tinin anmahni khaw hmasawnna tur an duan thiam theihna tura zirtir te, chumi tihlawhtling tura sawrkar scheme hrang hrang thawh hotir te a tum a ni.

Aadi Karmayogi Abhiyan hnuaia hma lakna tur hian Lunglei District chhunga block pathum - Lunglei, Lungsen leh Bunghmun huam chhunga khaw 48 thlan chhuah a ni a. He'ng khaw hrang hranga hma lak dan tur zirtir chhawng turin Lunglei District-ah District Master Trainer (DMT) pasarih awmin, State Process Lab-ah training an zo tawh a. Lunglei District-a block pathumah block tin aṭangin Block Master Trainer (BMT) panga ṭheuh ruat leh tur niin, District Process Lab-ah training pek an ni ang a. Block Level Orientation/Workshop te, Village Level Workshop te pawh la neih zel tur niin, khaw tinin an khuaa hma lakna tur Village Action Plan an duan dawn bakah, khaw tinah Village Seva Centre din a ni dawn bawk a. Hma lakna hlawhtlinna turin sawrkar department bakah, Civil Society Organisation (CSO) - tlawmngai pawlte pawh thawhpui turin ruahman a ni.