2094/2025-2026

Lunglei, 2025 Mimkut thla ni 11: Vawiin khan Mizoram State AIDS Control Society (MSACS) bul tuma HIV chungchang inzirtirna leh thisen endik runpui kalpui tur, "Intensified IEC Campaign & HIV Test Drive 2025" chu Lunglei District tan Lunglei District Additional Deputy Commissioner Pi Zoramdini'n a hawng.

Lunglei Convention Centre-a Intensified IEC Campaign & HIV Test Drive 2025 hawnna hun buatsaihah Addl DC Pi Zoramdini chuan HIV/AIDS chungchangah Mizoram dinhmun a duhawm lo hle tih sawiin, ram pum chawh ruala HIV positive 0.2% a nih laiin Mizoram chu 2.7% daih a nih thu leh mipui tam lam aṭanga teha HIV positive tam berna state a nih thu a sawi a. HIV/AIDS beihna kawngah National AIDS Control Programme hnuaiah MSACS kal tlangin sawrkarin theih tawpin hma a la mek tih sawiin, sawrkar hma lakna ngawt bakah, mipuite nen ṭan ho a ṭul thu a sawi a. IEC Campaign kal tlang hian thingtlang kilkhawr zawka HIV/AIDS chungchang inzirtirna nasa zawk kalpui leh a theih ang anga HIV endik tum a nih thu sawiin, hei hian HIV/AIDS chungchanga hriat dan leh ngaih dan dik lote a siam ṭhat a, HIV kaite'n thinhrik leh endawng an tawh ṭhin tihbo a nih a, mi tinin mahni dinhmun hre tura HIV test nachang an hriat phah beisei a nih thu a sawi a. Ṭhalaite chu HIV/AIDS laka him tura nun uluk tur leh HIV/AIDS dona kawnga mahni phak tawka thawk ṭheuh tura chahin, IEC Campaign kalpui turah theih tawpa thawktute ṭawiawm a, ṭanpui turin khawtlang hruaitu leh mipuite a sawm bawk.

Lunglei District AIDS Control Officer Dr K. Lalhmachhuana chuan inlawmna thu sawiin, HIV tihdamna a awm loh avangin HIV laka himna awm chhun chu inven chauh a ni, a ti a. Inveng thiam turin HIV/AIDS chungchang hriat tam leh inzirtir uar a ṭul tih sawiin, HIV/AIDS chungchanga inzirtirnate zawm ṭhat chu HIV laka himna tur a nih thu a sawi a. IEC Campaign kalpui turah mipui koh khawm, hmun hma ruahman leh HIV endik tura inkoh khawm chungchangah te hma lakpui a, khawtlang mipuite hrisel nan theih tawp chhuahpui turin khawtlang hruaitute a sawm.

BCM Social Concern Department Director Rev. RC Lalthanzama'n hunserh hmangin, MHIP-MIG Project Manager Pu K. Zosiamliana'n HIV/AIDS chungchanga hriat tur pawimawh hrang hrang a lem nen a sawi fiah a. Zaithiam zai ngaihthlak niin, MHIP-IDU Project Manager Pu Ramdinmawia'n lawm thu sawiin hun a khar.

Mizorama Intensified IEC Campaign & HIV Test Drive Drive 2025 kalpui tur hi August ni 12, 2025 khan Chief Minister Pu Lalduhoma chuan a lo hawng tawh a. Lunglei District-a he campaign kalpui dan tur hi September ni 2, 2025-a District AIDS Prevention & Control Committee (DAPCC) ṭhu khawm chuan relin, he campaign kal tlang hian Lunglei District khaw hrang hrang thlan bik sawmthumah HIV/AIDS leh mipat hmeichhiatna (sex) aṭanga natna inkai chhawn theih chungchang inzirtirna leh thisen endik (HIV test) runpui kalpui tum a ni a. Zirna inahte inzirtirna (awareness programme) buatsaih a nih dawn bakah, Lungleia MSACS staff-te leh VC leh YMA te nen ṭang kawpin ngawrh taka hma lak tum a ni.

MSACS kal tlanga Mizorama HIV/AIDS chungchanga hma laknaah, Mizorama District Hospital, PHC leh Sub-Centre thlengin a thlawna HIV endik theih tura kalpui niin, HIV enkawlna damdawi ART lakna tur District tinah ART centre dah a ni a. Damlote counselling ṭha tak pek an nih bakah, damdawi an ei ṭhat leh ṭhat loh ngun taka vil zui reng a ni a. HIV kai thei dinhmuna dingte HIV kai lova an him zel theih nana um zui turin Sampoorna Suraksa Kendra (SSK) project pawh district hrang hrangah kalpui mek a ni bawk.

HIV kai awlsam bikte - High Risk Group (HRG) he'ng IDU (damdawia inchiu ṭhin), FSW (hmeichhe inzuar), MSM (mipa leh mipa inkawp) leh migrant population (bridge population) te zinga hma lakna (Targetted Intervention)-ah Mizoramah NGO hrang hrang hnuaiah Project 36 kalpui mek a ni a. HIV leh STI endikna kalpui reng niin, HIV laka invenna hmanrua chi hrang hrang (hriau, condom, etc.) sem ṭhin a ni a. Ruihhlova inchiu ṭhinte'n an bansan theih nan a thlakna OST damdawi lakna tur OST centre 17 leh Satellite OST centre 68 din a ni tawh bawk a. He'ng hma laknain a thlen phak lohna thingtlang khuaahte Link Worker Scheme (LWS) dah niin, Mizoramah LWS pariat hmangin khaw 537 tuam chhuah a ni.