2982/2024-2025

2024 Sahmulphah thla ni 13: Vawiin khan Lunglei District Additional Deputy Commissioner Pu James Miahlung kaihhruaiin a office chamber-ah Lunglei District Level Yuva Utsav (Youth Festival) Organising Committee ṭhut khawm buatsaih a ni.

Pu James Miahlung chuan kal khawmte lawmna thu sawiin, Yuva Utsav chu district level-a buatsaih tut a nih angin department hrang hrangte ṭan rualna leh thawh hona a pawimawh thu a sawi a. Department hrang hrang ai awhte chu programme hlawhtlinna tura an ngaihtuahna seng turin a sawm a ni.

Nehru Yuva Kendra (NYK) State Director & Lunglei District incharge Pi Mercy Sellate chuan District Level Youth Festival (Yuva Utsav) chu ram chhunga district tinah hman tur a nih thu sawiin, ṭhalaite tihchakna (yuva shakti) rilru pu chunga Azadi Ka Amrit Mahotsav lawmna kal zel a nih thu a sawi a. India zalenna kum 75-na puala zalenna leh zalenna sualtute hlutzia theh darh a, sakhuana leh hnam ro hlu hrang hrang kan neihte mipuite zinga puan darh leh chawi nun hi a tum a ni, a ti a. Yuva Utsav thupui chu "Panch Pran of Amrit Kaal: India @2047" tih niin, kum 2047-ah chuan India ram chu ram hmasawn leh intodelh nihtir te, sal tang rilru aṭanga chhuah zalen te, hnam ziarang leh hlutna chawi san te, inpumkhatna vawn nun leh khua leh tui ṭha siam te chu he hma lakna hian a tum a nih thu a sawi a. He hma lakna hian district level aṭanga state leh national level thlenga hmasawnna hrang hranga ṭhalaite inrawlhtir a, ram hmangaihna leh India zalenna sual ngaihlutna rilru tihharh leh a tum a ni, a ti.

Organising Committee chuan Yuva Utsav hi December ni 4, 2024-ah Saikuti Hall, Lungleiah buatsaih ni se, tiin a rel a. He hunah hian Science Mela Exhibition (Group leh Individual Event), Young Artists Camp - Painting, Young Writers Camp - Poem, Photography Workshop, Declamation Contest leh Cultural Festival (Group Event) inelna te a awm dawn a ni. Exhibition-ah hian department hrang hrangin dawhkan (stall) hungin, sawrkar laipui ruahmanna (scheme)-te mipui hnena puanzarna remchangah an hmang bawk dawn a ni.

Attachment

  • Loading attachment...