2983/2024-2025

Aizawl 13th November, 2024 : Shri. Tokhan Sahu, Minister of State, Housing & Urban Affairs (MoHUA) chuan vawiin tlai dar 5 khan Planning & Programme Implementation (P&PI) Conference Hall-ah Urban Development & Poverty Alleviation (UD&PA) Department hotute kawmin Aizawl Smart City Ltd. hnuaia Project, Swachh Bharat Mission (Urban) (SBM-U), Atal Mission for Rejuvenation & Urban Transformation (AMRUT), Pradhan Mantri Awas Yojana - Urban (PMAY-U) leh Deendayal Antyodaya Yojana - National Urban Livelihood Mission (DAY-NULM) chungchanga an hmalakna leh an harsatna te sawiho a thutkhawm a ni.

Shri. Tokhan Sahu, Union Minister chuan Central Sawrkar chuan India ram hmun tinah hmasawnna a awm theih nan leh tumah hi hnuaihnung bik lo se an duh avangin theihtawp a chhuah mek a. Aizawl Smart City Ltd. hnuaia project te chu nakum March ral hma-a zo hman ngei turin a chah a. Project zawh tawh te pawh tha taka mipui hriat theih tur leh an hman tangkai theihna turin branding lamah leh a puanzar lamah nasa zawka hmala turin a chah. 

Hmasawnna lama Master Plan an siam te chu hmathlir thui tak, Kum 20 hun lo la kal tur thlir chunga ngaihtuahna hmang tura a duhthu sawiin Swachh Bharat Mission hnuaia IHHL (ek in)bsak tawh te chu a scheme a zawh ruala tawp mai lovin a tul anga mipuiin an tangkaipui theih nana hmala zel tur leh mipui tam zawkin an chhawr theih nan an hna tha taka thawk turin a chah a. PMAY-U Scheme-ah pawh tun aia nasa zawka tan la leh sauh sauh turin Department hotute chu a chah. An hnathawhah quality ngaipawimawh tur leh eirukna kawnga fihlim tura chahin naktuka Airport pana a haw pahin Smart City Ltd. project leh PMAY hnuaia in sakte en nghal a tum thu a sawi bawk a ni. 

Pu K. Sapdanga, UD&PA Minister chuan Minister of State for Housing and Urban Affairs-in a hun chep tak kara Mizoram a rawn tlawh thei chu lawmawm a tih thu sawiin Mizoram chu tlangram a nih angin MoHUA hnuaia project hrang hrang kalpui mekah hmanhmawhpui a, hna thawhna tur pawisa sanction thuai turin a ngen a. Kumin Cyclone Remal-in Amrut 2.0 hnuaia project a tih chhiat te chu a thara siam thatna tur sanction tura ngenin a tul anga hmalakpui a, second installment release thuai turin Union Minister hi a ngen a. Aizawl Smart City Ltd. hnuaiah project 49 atanga project 28 complete anih tawh thu sawiin project 22 chu nakum March 31-ah zawh tura ruahhman niin project 5 chauh nakum March 31 hnu lamah zawh hman tura beisei a nih thu a Minister hi a hrilh a ni.

He hunah hian Pu CC Lalchhuangkima, CEO, Aizawl Smart City Ltd. chuan Smart City hnuaia an hmalakna hrang hrang a lem nen entirin a tarlang a. Aizawl Smart City Ltd. hnuaiah hian project 49 awmin project 28 chu thawh zawh tawh a ni a, project 16 chu nakum March Ni 31 chhunga zawh fel tura ruahhman a nih thu a sawi. UD&PA Director Dr. Andrew Vanlaldika chuan Ministry of Housing and Urban Affairs (MoHUA) kaltlanga Centrally Sponsored Scheme pali hnuaia an hmalakna te powerpoint presentation hmangin a tarlang bawk a ni.

He hun hi Pi Zarzokimi, Jt. Secretary, UD&PA chuan kaihruaiin MoS PS Pu MB Singh, Pu Joseph H. Lalramsanga, Municipal Commissioner, Aizawl bakah Aizawl Smart City Ltd. leh UD&PA hnuaia Officers leh Staff te meeting-ah hian an tel a ni.