1223/2026-2027

Lunglei, 2026 Nikir thla ni 29: Vawiin khan Lunglei District Task Force on Immunisation (DTFI) chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. National Immunisation Day (NID) 2026 kalpui dan tur an sawi ho bakah, Sub-National Immunisation Day (SNID) 2025 leh HPV Vaccination Campaign 2026 kalpui zawh taka hma lakna leh Lunglei District dinhmun an thlir ho.

He hunah hian Health & Family Welfare, School Education, Women & Child Development leh Information & Public Relations department ai awhte leh YMA Sub-Headquarters Lunglei ai awhte an tel a. Lunglei District Immunisation Officer Dr Christina Zonunmawii chuan National Immunisation Day-a zenghri dan beihpui thlak kalpui dan tur ruahmanna te, kum 2025-a zenhri danna pek runpui (SNID) kalpui dan leh kumina HPV Vaccination Campaign hnuaia chhul hmawr cancer venna vaccine pek kalpui dan report te a pe a. Lunglei District-a hlawhtling taka hri danna pek a nih theih nana hma lak dan tur leh rawtna hrang hrang sawi ho a ni.

District Bawrhsap Pi Navneet Mann chuan hriselna lama thawktute, department hrang hrang, tlawmngai pawl, khawtlang hruaitute leh mipuite thawh hona leh ṭawiawmna avangin hri danna pek kawngah Lunglei District-in hlawhtlinna duhawm tak a hmu ṭhin chu lawmawm a tih thu a sawi a. NID kalpui leh turah pawh hri danna la thei zawng zawngin an lak vek theih nan thawktute chu theih tawp chhuah tura chahin, nu leh pate pawhin an fate hri danna laktir ṭheuh turin a chah.

National Immunisation Day (NID) hi Mizoramah chuan July ni 1, 2026 (Nilaini) khian zenghri dan beihpui thlak (Pulse Polio Immunisation) ni atan hman a ni dawn a. Hemi ni hian naupang kum 5 hnuai lam zawng zawng chu zenghri danna kaa thlawr chi (oral polio vaccine) pek an ni dawn a. Hemi huna hri danna pek tur hi Lunglei District-ah naupang 10,595 target an awm a. July ni 1-ah hian khaw hrang hrangah hmun 193 (booth 190 leh Lunglei khawpui chhunga transit point 3)-ah hri danna pek hi kalpui a ni ang a. Hemia pek bakte chu July ni 2 leh ni 3-ahte hriselna lama thawktute'n in tinah lut chhuakin hri danna hi an pe ang.

March ni 16, 1995 khan National Immunisation Day hi India ramah a vawi khat nan hman niin, zenghri danna pek beihpui thlak ṭan a ni a. India rama zenghri vei hmuh chhuah hnuhnun ber chu January ni 13, 2011 kha niin, March ni 27, 2014 khan World Health Organisation (WHO) chuan India chu zenghri awm lohna ram (polio free)-ah a puang tawh a. Hetih lai hian ram ṭhenawmah zenghri hmuh a la nih reng avangin zenghri danna pek hi kalpui chhunzawm zel a la ni.

Kum 2025 October ni 14–16 inkar chhunga zenghri danna pek runpui (SNID) kalpuiah khan Lunglei District-ah zenghri danna pek tur target 11,158 awmin, booth leh house to house activity kal tlangin naupang kum 5 hnuai lam 11,031 chu zenghri danna pek an ni a. A pum puia zenghri danna pek zat hi target aṭangin 98.9% a ni.

Vawiin ṭhut khawmah hian February 28 – May 31, 2026 chhunga chhul hmawr cancer thlentu Human Papillomavirus (HPV) laka invenna tur vaccine pek runpui kalpuiah Lunglei District chhunga vaccine pek tur hmeichhe tleirawl (kum 14 aṭanga kum 15 leh thla 3 inkar) 1,243 tinzawnah mi 1,326 (107%) chu vaccine pek an nih thu tar lan niin, target khum a nih theih chhan hi Senior Chief Medical Officer (SCMO) leh a thawhpuite bakah, District Education Officer leh a thawhpuite, department hrang hrang, tlawmngai pawl leh khawtlang hruaitute thawh hona vang a nih thu tar lan a ni a. Hriselna kaihhnawiha hma lakna hrang hrang a hlawhtlin theih nana hma lakpuitu Bawrhsap leh department hrang hrangte, tlawmngai pawl, khawtlang hruaitu leh mipuite chungah Deputy CMO Dr Vanlalngheti chuan health department ai awhin lawm thu a sawi.