1224/2026-2027

Lawngtlai, 29th June 2026: Delay Registration of Births & Deaths chungchangah vawiin khan Lawngtlai bawrhsap Pu Donny Lalruatsanga kaihhruaiin DC Conference Hall-ah District Level Coordination Committee an thukhawm.

Pu Donny Lalruatsanga chuan Member-kalkhawmte hnena lawmthu sawina a nei a. Tun hnaiah 'Birth Certificate' lem a tam hle tih hriat a ni a, hemi vang hian Birth Certificate - pekchhuah kawngah fimkhur thar a tul hle a ti a. Documents diklo taka siam a, Birth Certificate - lem siam thinte zawnchhuah a hrem an nihna tura District Administration - in theihtawp a chhuah thu a tarlang a. A bik takin Non Availability Certificate (NAC) pekchhuah kawngah sawrkar Official- te fimkhur zual a tul hle tiin, uluk zawka documents - te endik thin turin a chah a. Bawrhsap chuan VC,YLA,YCA leh Kohhran- te pawhin mawhphurhna an nei sang hle tiin,veng mi leh sa dik tak, India khua leh tui dik tak chauh hriatpuina lehkha siamsak thin turin a chah a ni. Birth Certificate - pekchhuah chu khauh zawka kalpui a nih tur thu tarlangin Pu Donny Lalruatsanga chuan VC, NGOs, Kohhran leh Lawngtlai District- mipuite thawhpuiah a sawm nghal bawk.

Pu Jimmy Lalkungliana Sailo, DRO leh Member Secretary nibawk chuan 'Birth Certificate' dil dawna hriat tur pawimawhte leh 'documents' ngaite sawifiahna a nei a. Non Availability Certificate (NAC) pek kawngah uluk leh fimkhur zawka kalpui a nih thu a tarlang a ni.

Thutkhawmah hian thil pawimawh tak tak sawiho a ni a. Birth Certificate - pekchhuah chungchangah fimkhur thar a tul hle tiin, Sawrkar Official leh VC, NGOs leh Kohhran - ten mawhphurhna an neihte tha tak hlen ni se an ti a. A bik takin venchhung mi leh sa ngei a ni tih hriatpuina lehkha siam kawngah tun aia tan lak nasat a tul hle tiin, hemi kawngah hian VC- tinten fimkhur zawkin hmalakna lo nei se an ti a. Kohhran pawhin mawhphurhna an nei sang hle tiin, Kohhran atanga lehkha pekchhuah kawngah fimkhur thar ni se an ti a. Hnam leh chibil inthliarna awm lo a, danin a phut anga dik taka pekchhuah tur a nih angin thukhawm chuan mahni zawnah theuh theihtawp chhuah chhunzawm zel ni se an ti bawk a ni.

Vawiin thutkhawmah hian Lawngtlai District Level Coordination Committee on Delay Registration of Births & Deaths- te an telkim tha hle a, Pu Donny Lalruatsanga chuan lawmthu sawiin hun a khar.