623/2025-2026

Lunglei, 2025 Ṭomir thla ni 15: Vawiin khan Lunglei District TB (Tuberculosis) Forum chu Lunglei District Additional Deputy Commissioner Pi Rochuangkimi Khenglawt hovin Lunglei DC Conference Hall-ah an ṭhu khawm.

He ṭhut khawmah hian sawrkar official-te, NGO leh MJA ai awhte leh TB champion te an tel a. District TB Officer Dr K. Lalhmachhuana chuan District TB Forum hnuaia hma lakna report pein, ṭhut khawm buatsaih chhan a sawi fiah a. Kum kal ta leh kal meka TB chungchanga hma laknaa Lunglei District dinhmun thlir ho niin, TB um bona tura ni 100 chhung beihpui thlak, '100 Days TB Intensified Campaign for TB Elimination' kalpui tur chungchang te, TB chungchang zau zawka inzirtirna kalpui tur leh TB veite chhawmdawlna leh hamṭhatna atana hmachhawp awmte leh hmasawnna tura rawtna hrang hrangte sawi ho a ni.

TB um bo tura ni 100 chhung ngawrh taka beihpui thlak tur atana inbuatsaihna sawi ho niin, Lunglei District chhung khaw hrang hranga TB vei hlauhthawnawm dinhmuna dingte zawng chhuakin he beihpui thlak chhung hian an dinhmun enfiah vek a ni dawn tih tar lan a ni a. He beihpui thlak chhung hian khaw hrang hrangah kal chilhin TB enfiah, enkawl, chaw ṭha pek leh TB venna kawnga hma lakna te uluk leh ngawrh taka kalpui a ni dawn a. Beihpui hawnna hun hi May ni 20, 2025 (Thawhlehni) chawhma dar 11:00-ah Lunglei Home TNT hmunah buatsaih ni se, tih a ni.

Health & Family Welfare data ang chuan, Lunglei health district-ah mihring 1,89,094 vel awm anga chhut niin, khawpuiah mi 86,136 leh thingtlangah mi 1,02,958 cheng anga chhut a ni a. Kum 2024 (January - December) chhungin Lunglei health district (Lunglei District leh Hnahthial District)-ah ngawr (TB) vei rinhlelh enfiah 3,772 aṭangin TB vei hmuh chhuah 147 (chuap TB 77, chuap ni lo TB 66 leh MDR TB 4) an awm a. Mi 134 enkawl dam niin, TB vei enkawl laia thi 6 an awm a ni.

Kumin 2025 (January - April) chhungin Lunglei health district-ah TB rinhlelh enfiah 644 aṭangin TB vei hmuh chhuah 44 (chuap TB 24, chuap ni lo TB 17 leh MDR TB 3) awm tawhin, mi 39 hlawhtling taka enkawl an ni a. Enkawl laia thi 2 an awm thung a ni.

Lunglei health district chhunga khaw 186 awmah kum 2023 khan TB awm lohna khua (TB free village)-a puan khaw 18 awmin, kum 2024-ah TB free village 22 an awm thung a. Kum 2023-a TB free village kum 2024-a puan nawn (Mahatma Gandhi Statue Silver dawng) khaw 9 awmin, a kum khatna atana puan thar (Mahatma Gandhi Statue Bronze dawng) khaw 13 an awm thung.

TB free village ni tur hian kum khat (January - December) chhungin khaw khata mihring cheng zat azirin mi 1,000 zelah mi 30 tal endik tur niin, mi 1,000 zelah TB vei nem ngheh mi 1 aia tam an ni tur a ni lo va; TB vei enkawl hlawhtlin 85% aia sang tur niin, TB veite chuan Nikshay Poshan Yojna (NPY) leh Nikshay Mitra ṭanpuina an dawn ngei a ṭul bawk a ni.

District TB official-te chuan TB hrik en leh damlo enkawlna chu sawrkarah a thlawn vek a nih bakah, NPY hnuaiah damdawi ei chhung zawng thla tin ₹ 1,000/- pek an nih thu leh inenkawl zawh hnuah ₹ 750/- pek ṭhin an nih thu sawiin, TB chu enkawl hma a, ṭha taka damdawi ei chuan a dam hmain, harsatna nasa zawk a pumpelh theih tih an sawi a. Hei bakah hian TB veite'n an inenkawl chhunga chaw ṭha an dawn theih nan mi inphal (Nikshay Mitra)-te hnen aṭangin ṭanpuina sum dawn ṭhin a ni bawk a. Nikshay Mitra (donor)-te sum pek hmang hian thla khatah damlo pakhat tan ₹ 700/- man hu ei tur ṭha leisaka pek ṭhin an ni a. Nikshay Mitra tur hian thla tin ₹ 700/- hisapin thla ruk emaw, a aia rei emaw chhung atan ṭanpuina pek theih niin, District TB Forum chuan TB veite tan mi inphalte pen chhuak zel turin a ngen a. Heti anga inphal, ṭanpuina pe theite chu Lunglei District Senior Chief Medical Officer office-ah inhriattir theih a ni.