1688/2026-2027

Lunglei, 2026 Thlazing ni 7: Vawiin khan Lunglei District Water & Sanitation Mission (DWSM) chu Election Officer Pi Lalhruaitluangi kaihhruaiin a hna thawh pindanah an ṭhu khawm a. Public Health Engineering, Urban Development & Poverty Alleviation, Local Administration leh Information & Public Relations (I&PR) official-te an tel.

PHED Lunglei Sub-Divisional Officer (North) Er NT Jevis chuan bawlhhlawh sawngbawlna dan thar, Solid Waste Management (SWM) Rules, 2026 zul zuia tui chhia (grey water) leh bawlhhlawh ṭawih thei (wet waste) sawngbawl leh thehthang nana Lunglei District chhunga hma lak dan tur leh hmanraw hman tur an duan chhin chu chhawp chhuakin, a sawi fiah a. In chhungkhur tui chhe paihna leh sawngbawlna tura khur (scum chamber leh soak pit) siam dan tur ruangam, "Grey Water Management Technology" leh lei ṭha atana bawlhhlawh up ṭawihna khur (compost pit) siam dan tur ruangam, "Twin Pit Composting Method" an duan chhin chu thlir ho niin, pawm a ni a. Khaw ṭhenkhatah en chhinna (pilot project) anga kalpui hmasak theih dan kawng zawn ni se, tih a ni.

He ṭhut khawmah hian Supreme Court thupek bawhzuiin SWM Rules, 2026-in bawlhhlawh thliar hran dan chi li – wet waste (ṭawih thei), dry waste (ṭawih thei lo leh hman nawn theih), sanitary waste (mihring thli) leh hazardous/special waste (damdawi, electric leh rawng lam chi) a ruahman anga October ni 31, 2026 hmaa District chhung khua zawng zawng aṭanga 30%-ah tal kalpui hman turin Lunglei District Deputy Commissioner Office aṭangin District Action Plan duan a nih thu leh state level aṭanga pawmpuina hmuh a nih tawh thu sawi lan a ni a. He District Action Plan zul zui hian Lunglei District-a Local Council 6-ah leh Village Council 32-ah thliar hran dan chi lia bawlhhlawh thliar hran hi kalpui hmasa phawt tura ruahman a nih thu leh bawhzui turin Block tina Block Development Officer-te hnenah lehkha thawn chhuah a nih tawh thu sawi lan a ni bawk.