1689/2026-2027

Lunglei, 2026 Thlazing ni 7: Vawiin khan Lunglei District Bawrhsap Pi Navneet Mann hovin Lunglei DC Conference Hall-ah Lungleia Independence Day 2026 atana inbuatsaihna kal mek thlir ho a ni a. Sawrkar official-te, zirna in, pawl hrang hrang leh kohhran ai awhte an tel.

He ṭhut khawmah hian Independence Day 2026 lawmna atana mawhphurtu hrang hrangte hma lak tawh chin thlir ho niin, mawhphurtute'n an mawhphurhnate ṭha taka an bawhzui thu leh inbuatsaihna hrang hrang pawh tluang taka kalpui a nih thu sawi lan a ni a. Hlawhtling taka hun hman a nih theih nana ruahmanna leh hmachhawp hrang hrangte sawi ho niin, Bawrhsap chuan mawhphurtute chu ṭha taka an mawhphurhna hlen chhuah tum turin a chah nawn a. District mipui zawng zawngte chu Independence Day lawmnaah tel ṭheuh turin a sawm bawk.

Independence Day ceremonial parade atan August ni 10, 2026 (Thawhṭanni) zingkar aṭangin parade zir ṭan tum niin, August ni 13, 2026 (Ningani) zing dar 9:00-ah final rehearsal buatsaih tum a ni a. Ceremonial parade-ah hian armed contingent 5, unarmed contingent 9, school contingent 10 leh pipe band 2, a vaiin contingent 26 awm thei tura beisei a ni.

Kumin Independence Day lawmna hi C. Ṭhuamluaia Mualah August ni 15, 2026 (Inrinni) zing dar 9:00-ah hman tura ruahman niin, Mizoram Health & Family Welfare Minister Pi Lalrinpuii chu Khuallian tura beisei a ni a. Muala Independence Day lawmna hun hman zawh, chawhma dar 11:30-ah Circuit House-ah 'VIP At Home' inkawm hona buatsaih tum a ni bawk a. Independence Day pual hian Football, Carrom, Badminton, Tennis leh Table Tennis inelna buatsaihna senso tum ṭhensak remtih niin, Lunglei District-a chhawmdawlna in leh damdawi in thlan bikah te  ṭanpuina thilpek pek leh tum a ni bawk.