1690/2026-2027 

Dated Khawzawl, the 7^th August, 2026 : Vawiin khan District Treasury Office, Khawzawl chuan Pension Payment Order mahni duh thua hlan let (Voluntary Surrender of Pension Payment Order) chungchang inhrilhhriatna hun Zaingen YMA Hall, Khawzawlah an buatsaih a. Khawzawl District Treasury Officer (TO) Pu Aloys Lalchunglura chuan hun kaihruaiin, dik lo taka Family Pension latute zingah dan hriatchian loh vanga la an awm thei tih sawiin, hun tiam chhung ngeia PPO hlan let a pawimawh thu a sawi.

Vawiin programme-a Resource Person Pu C. Lalramchhuanga, Assistant Audit & Accounts Officer (AA&AO), Local Fund Audit & Pension chuan Family Pension lak theih dan hrang hrang a tarlang a. Family Pension dan lova lak hian nghawng tha lo a neihte sawiin, sawrkarin sum tam tak a hlauh phah thu leh ram hmasawnna atana sum hman tur dik lo taka a kal ral thu a sawi a. Dan lova Family Pension lak hi eirukna chi khat a ni tih sawiin, a tawpah a tuartu ber chu Mizoram mipui an ni, a ti a. Kohhran leh khawtlang hruaitute pawh lehkha pek chhuah kawngah fimkhur lehzual turin a chah.

Sawrkar chuan July ni 1 , 2026 atanga September ni 30, 2026 thlengin diklo taka pension late mahni duh thua pek kir hun (Voluntary Surrender of PPOs) a hawnsak a. Hun tiam chhunga PPO pe kirte chu an pension lak tawh zawng zawng sawrarin a ngaihdam dawn a. September ni 30 hnulamah chuan District tinah dan lova Pension late zawn chhuahna tur District Level Task Force din a ni dawn a, dik lo taka pension late chu dim an ni dawn lova, thubuai ziahsak an ni dawn a ni.  

He hunah hian kohhran leh khawtklang hruaitute bakah Mizoram Civil Pensioners Association, Khawzawl District member-te an tel a. Pu Lalrintluanga, Assistant Accounts Officer, Khawzawl District Treasury Office chuan lawmthu sawiin hun a khar.