1946/2026-2027

Lunglei, 2026 Thlazing ni 25: Vawiin khan Lunglei District Water & Sanitation Mission (DWSM) chu an Chairman, District Bawrhsap Pi Navneet Mann hovin a hna thawh pindanah an ṭhu khawm a. Public Health Engineering, Rural Development, Urban Development & Poverty Alleviation, Local Administration leh Information & Public Relations official-te an tel.

Lunglei DWSM Member Secretary, PHED Lunglei Rural WATSAN Divison-a Sr Executive Engineer Dr ZR Ṭhasangzuala chuan thu ngaihtuah tur a sawi zau va. Thingtlang khaw hrang hrangah tui lak hnianghnar a awm theih nana tui hnar ṭha leh rin tlak siam theih dan tur sawi ho niin, tui lak hnar leh a chhehvel vah chereu a nih lohna tur leh humhalh a nih theih nana hma lak dan kawng zawn te, tuihna awm sa humhalh leh tuihna tipung tura thing phun belh te, tui hnarte veng him tur leh uluk taka enkawl zui tura inzirtir leh hma lak te rel a ni.

Thingtlang khaw hrang hranga tui pekna (rural drinking water system)-te ṭha taka enkawl zui a nih theih nana rawtna hrang hrang sawi ho ni bawkin, khawtlang mi khawl enkawl dan thiam bik leh tuipu turte chungchanga inkaihhruaina fel tak ruahman te, hnatlang leh sawrkar scheme dang nena thawk hova hma lak dan tur leh khawl enkawl leh tui lakna chhia siam ṭhat dan inzirtirna buatsaih te rel a ni.

He hunah hian bawlhhlawh sawngbawlna dan thar, Solid Waste Management (SWM) Rules, 2026 zul zuia tui chhia (grey water) leh bawlhhlawh ṭawih thei (wet waste) sawngbawl leh thehthang nana Lunglei District chhunga hmanraw hman tur meeting hmasain a pawm tawh bawhzui dan tur sawi ho a ni a. Tui chhe paihna leh sawngbawlna tura khur (scum chamber leh soak pit) siam dan tur ruangam duan hmanga Lunglei District chhunga khaw 38-a sikul 64 leh Primary Health Centre (PHC) 5-a Greywater Management Unit siamna tur leh lei ṭha atana bawlhhlawh up ṭawihna khur (compost pit) siam dan tur ruangam duan sa hmanga khaw 48-a sikul 71 leh PHC 5-a NT Jevis Twin Pit Composting Unit siamna tura PHED lamin Detailed Project Report (DPR) an siam chu thlir ho niin, Swachh Bharat Mission (Gramin) Mission Director hnena theh luh remtih a ni a. Department dang hnuaia scheme hrang hrang nena thawh ho dan leh hma lak zui dan kawng zawn ni se, tih a ni bawk.