1945/2026-2027
Kolasib, 25th August, 2026: Environment, Forests & Climate Change Department, Kolasib Forest Division chuan thuchhuah siamin, kumin September 2026 chhung chu "Zero Tolerance Month" (Ramngaw leh Nungcha humhalhna dan bawhchhiate chunga ngaihhnathiamna lantir loh thla) atan an hman dawn thu an puang.
Divisional Forest Officer (DFO), Pu P.C. Laltanpuia, IFS thuchhuahin a tarlan danin, Kolasib Forest Division hi thing (timber) tamna hmun a nih avangin dan lova thing kih, zai leh tawlh ruk a awm reng thin a. Hemi bakah hian ramsa leh sava te dan lova tihhlum, an sa zuar leh an taksa peng (lu, mei, hmul leh adangte) kawl an awm fo thin bawk a ni.
Heng dan bawhchhiatnate titawp tur hian department chuan theih tawpin hma la thin mah se, duh angin hmalakna a hlawhtling tawk thei rih lova. Dan bawhchhetu man chhuahte hi mi harsa zawk an lo nih fo avangin dan ang taka hrem mai lovin khawngaihna leh hriatthiamna lantir a ngai fo thin a. Amaherawhchu, hetianga hriatthiam an nihna hi hmang sualin dan bawhchhetute a tingampa zawk mah tih hriatchhuah a ni, a ti.
Hetiang a nih avang hian September, 2026 chhung hian Kolasib Forest Division huam chhungah "Zero Tolerance Month" hman a ni dawn a. He hun chhunga dan bawhchhia mante chu dan ang thlapa hrem an ni ang a, ngaihhnathiamna reng reng a awm tawh lo vang tih mipuite a hriattir a ni.
