4816/2025-2026

Lunglei, 2026 Vau thla ni 12: Vawiin khan Lunglei District Social Welfare Office (DSWO) chuan Lunglei Rahsiveng MUP Runah kum upate pualin hun an hmanpui.

He hun hi Ministry of Social Justice & Empowerment hnuaia scheme, Atal Vayo Abhyuday Yojana sub-scheme, "State Action Plan for Senior Citizens" hnuaia hma lak mek chhunzawmna a ni a. Kum upate'n hamṭhatna hrang hrang an dawn theihte zirtir an nih bakah, mahnia insawizawi dan zirtir an ni bawk a. National Social Assistance Programme (NSAP) hnuaia upa chhawmdawlna (pension) leh hmeithai pension late  chu an la dam ngei tih chianna Digital Life Certificate tihfelsak niin, upate puitu leh hmanraw hrang hrang dilna hun siam a ni bawk.

Lunglei District Social Welfare Officer Pu C L Joseph chuan upate tana hamṭhatna hrang hrang a sawi a. NSAP hnuaia upa pension chu NSAP portal aṭanga pek a nih tawh thu te, PFMS registration a fel loh avanga pension pek theih lohte buaipui mek a nih thu te, a fel veleh an lak loh chin pek vek an nih dawn thu te sawiin, hlauthawng lo turin a chah.

Mizo Upa Pawl (MUP) Headquarters General Secretary, Rahsiveng Unit MUP President ni bawk Pu LH Sanghluna'n hun a kaihruai a. Civil Hospital Lunglei Department of Ayush-a Physical & Stress Management Professional Dr Reuben Lalṭhazuala leh Rahsiveng Local Council Vice Chairman Pu PC Mosia te pawhin hun an hmanpui bawk.