4815/2025-2026

Lunglei, 2026 Vau thla ni 12: Vawiin khan Lunglei District Bawrhsap Pi Navneet Mann chuan Urban Development & Poverty Alleviation (UD&PA) Department, Lunglei hnuaia sikul bungrua inthleng runpui, "Swap & Save Campaign" kalpui mek chu a hmunah tlawhin, an hma lak dan a enpui.

Bawrhsap hi District Urban Development Officer Pi Lalhruaitluangi leh thawktute'n lo dawngsawngin, an hma lakna kalpui dan an lo hrilhfiah a. Bawrhsap chuan Swap & Save Campaign hma lakna kal mek chu ṭha a tih thu leh ṭangkai taka hman a nih a beisei thu a sawi.

He Swap & Save Campaign hi 3R Centre, UD&PA Department Building, Chanmari,m (Opposite BCM Biak In, Chanmari)-ah kalpui mek niin, he campaign chhung hian sikul bungrua —zirlaibu, uniform, school bag, tiffin box leh thil dang hman hlui, la ṭha si te thawh theih niin, a mamawhte tan a thlawnin lak theih a ni bawk a. March ni 21, 2026 thlengin he campaign hi kalpui tum a ni.

Bawrhsap hian Chanmari Anganwadi Centre pawh tlawhin, Poshan Tracker app kal tlanga hmel finfiahna (Aadhaar face recognition)-a harsatna awm dan a enfiah a. PM-Poshan hnuaia naupang leh nute'n chaw ṭha an dawn turte anmahni ngeiin an dawng tih finfiah nan Poshan Tracker app-ah hian an Aadhaar Card chhinchhiah sa hmangin nutrition latute hmel online-a finfiah phawt a ngai ṭhin a. Hemi kawngah hian khawl lam harsatna avanga hmel hmuh dik theih loh a awm ṭhin avangin Anganwadi Centre hrang hrangah harsatna an tawk ṭhin a. Hei hi chin fel a nih theih nan leh an harsatna a taka hmuhpui turin Bawrhsap hian Anganwadi Centre hi tlawhin, Poshan Tracker an hman dan hi a enfiah a ni.

Bawrhsap Pi Navneet Mann chuan Hrangchalkawn Urban Primary Health Centre (UPHC) pawh tlawhin, Medical Officer Dr VL Hrechianga leh thawktute'n an lo dawngsawng a. Tun hnai lawka tlangzarh thar, LushAI Healthy Lunglei (LHL) mobile application kal tlanga damlote inentir tura an inziah luh theih dan leh an hriselna dinhmun leh damdawi chawhna an dawn theihna chu a taka hmang chhinin, uar zawk leh ṭangkai zawka hman a nih theih dan tur te, awlsam leh felfai zawka hman theih tura tihchangtlun ṭulna laite a hmunah hian a enfiah a. LHL app kal tlang hian damdawi ina inentir tura inziah luh theih a nih bakah, damdawi dawrah damdawi te pawh chah theih a ni a. Bawrhsap chuan LHL app chu hriselna lama hmasawnna leh awlsamna atan ṭangkai taka hman tum turin Lunglei District mipuite a chah.