4814/2025-2026

Lunglei, 2026 Vau thla ni 12: Vawiin khan Lunglei District Bawrhsap Pi Navneet Mann chuan National Highway-54 & 302 kawngpui laih zauh leh siam ṭhat hna thawh meka Theiriat–Hrangchalkawn leh Lungpuizawl–Zobawk huam chhunga hma lakna hrang hrang leh harsatna awmte chu a hmunah kal chilhin a enfiah.

Bawrhsap hi Assistant Commissioner (Revenue) Pi Jennifer Vanlalhruaii Pachuau, District Information & Public Relations Officer Pu C. Lalhruaitluanga leh official dangte, kawng siam mek enkawltu NHIDCL (National Highways & Infrastructure Development Corporation Limited) te, hna thawktu contractor BRN Infrastructure Private Ltd te leh Lunglei Sub-Headquarters YMA hruaitute'n an ṭawiawm a. Theiriat leh Zobawk khawtlang hruaitu (local council) te leh Zobawk Joint YMA hruaitute'n lo dawngsawngin, an harsatna te a hnenah an lo thlen a. Hna kal meka hmasawnna awm dan leh khawtlang mipuiin harsatna an tawh leh hna thawktute'n harsatna an tawh te en hovin, hma lak zel dan tur leh harsatna hrang hrang chin fel dan tur te an sawi ho.

Sethlun huam chhunga kawng laih tur hmabak awm chu ṭhal lehpeka thawh theih turin zangnadawmna dilna hmuh thar leh a hmun tihfel ngaite chu a rang lama bawhzui ni se, tih a ni a. Theiriat huam chhunga Mengpui hnar aṭanga T-Way Filling Station leh kawng chung lei minna lai thlenga lungrem (retaining wall) siam leh kawng luan (blacktopping) hna chu contractor-te'n tunah hian GSB dah ṭan mekin, April thla chhunga an thawh zawh tur thu an sawi a. Lei min hlauhawmna laiah te ṭha taka lungrem siam tur leh Mizoram Polytechnic bula lungrem leh kawng siam hna chu April thlaa zo hman tur te'n Bawrhsap chuan contractor-te chu a hriattir bawk.

Lungpuizawl leh Zobawk huam chhunga ram neitute aṭanga harsatna awm chu ram neitute leh contractor-te nen a chin fel dan tur sawi ho niin, inrem dan kawng zawn a ni a. Zobawk huam chhunga ram neitute'n zangnadawmna an hmuh loh vang leh harsatna dang vanga kawng laih an remtih lohna ṭhenkhat chu an harsatna chin fel chhoh mek a nih avangin a rang lama hna ṭan tura tih niin, zangnadawmna la tawh in pathum ṭhiah tur awm chu kar lehah a neitute'n ṭhiat ṭanin, an ṭhiah zawhah hna thawh ṭan ni se, tih a ni bawk.

He hunah hian Zobawk Joint YMA leh Local Council te'n kawng siam chungchanga an ngaih pawimawh leh hma lak hmanhmawh an duh lai hrang hrangte chu Bawrhsap hi lo kawhhmuhin, chak zawk leh ṭha zawka hma lak dan tur sawi ho a ni a. Zobawk khaw chhunga retaining wall siam sa a khik avanga siam ṭhat ngai chu a bul kawng luan leh tuiluankawr siam te March thla chhunga khawih tura tih niin, chumi zawhah hma lak zui dan tur chu la ngaihtuah ho ni se, tih a ni a. Ram buai hrang hrang chin fel dan tur leh ram teh ṭhat tur te, kawng laih, kawng luan, lungrem siam, tui luankawr siam, culvert siam leh hna hrang hrang thawh tur ruahman te chu chak taka bawhzui ni se, tih a ni a. Contractor-te hna thawh dan chu YMA leh LC te'n lo vil zuiin, harsatna awmte chu Bawrhsap hnenah lo thlen se, ṭha taka sawi ho leh thawh ho zel ni se, tih a ni.