DIRECTORATE OF INFORMATION & PUBLIC RELATIONS, Government of Mizoram, India

192/2026-2027

Lunglei, 2026 Ṭau thla ni 17: Vawiin khan Lunglei District Task Force on Immunisation (DTFI) chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. Lunglei District-a kum 2025–2026 chhunga naupang leh raipuarte hnena natna hri leng inkai chhawn theih laka invenna (vaccine) pek dan dinhmun thlir hovin, hri danna pek chhunzawm dan tur leh ṭhenawm ram Bangladesh-a sentut hri leng mekin Mizoram a lo thlen lohna tura hma lak dan tur hrang hrang an sawi ho.

DTFI Chairman Pi Navneet Mann chuan Lunglei District chu ramri hnaiha awm a nih angin hri leng hrang hrang lakah fimkhur a ngaiin, thawktute pawh an rim zual tih sawiin, hri danna pek kawngah leh hri leng ven kawnga thawktute inpekna leh thawh rimnaah lawm thu a sawi a. Ram ṭhenawma sentut hri lengin Lunglei District a lo thlen loh nan thawktute chu theih tawp chhuah zel tura chahin, hriselna kaihhnawiha hma lakna hrang hrangah District thuneitute, District Rural Development Office leh BDO-te, ICDS hotute leh anganwadi worker-te, local/village council leh tlawmngai pawl hrang hrangte nen thawh hona ṭha tak neih a pawimawh thu a sawi a. Hri danna pek kawngah thingtlang lam chu ngaih pawimawh zual a ṭul thu sawiin, kim zawka vaccine pek a nih theih nan fur hmain special vaccination drive ruahman tur te, vaccine lak chungchanga mipui zirtirna leh fuih phurna atan department leh pawl hrang hrangte nen thawk ho zel tur te'n thawktute a chah bawk.

World Health Organisation (WHO) hnuaia Surveillance Medical Officer Dr Lalhlimpuii chuan ṭhenawm ram Bangladesh-a sentut (measles) hri leng mek chungchang leh Mizoramah he hri leng hi a darh lohna tura hma lakna tur pawimawh hrang hrangte PowerPoint presentation hmangin a tar lang a. Sentut hri leng laka him nan sawrkarin Measles-Rubella (MR) vaccine a pek ṭhin chu ṭha taka lak a pawimawh thu te, sentut kai rinhlelh damlo (khawsik leh bawl) te chu rang taka inentir a, endik leh thlithlai ngun a pawimawh thu te, hriselna lama thawktute, department hrang hrang leh tlawmngai pawlte chu hri leng thlithlaina leh hri danna pek chungchanga ṭha taka thawh ho a pawimawh thu te a sawi.

Lunglei District Immunisation Officer Dr Christina Zonunmawii chuan kum 2025 April leh kum 2026 February inkar chhunga routine immunisation hnuaia hri danna pek dan dinhmun a tar lang a. Kum 2025–2026 chhungin Lunglei District-ah nausen kum 1 hnuai lam hri danna la thei tura tinzawn (target) 1,953 zinga 1,616 (82.75%) chu hri danna la kim (fully immunised child) an nih thu sawiin, hetah hian March 2026 report a la tel loh avangin la pung chho tura beisei a nih thu a sawi.

He ṭhut khawmah hian Lunglei District Senior Chief Medical Officer Dr Lalrinthangi leh State Programme Officer (Reproductive & Child Health) Dr S. Thaizi te bakah, Health Department leh department hrang hrang official-te, Lungleia damdawi in hrang hrang, Sub-Headquarters YMA leh Local Council Association ai awhte an tel a. Lunglei District chhungah ṭha leh hlawhtling zawka vaccine pek kalpui a nih theih nana rawtna hrang hrang sawi ho niin, department hrang hrang nen ṭang tlanga hma lak theih dan turte sawi ho a ni bawk.

Vawiin ṭhut khawma tar lan a nih danin, kum 2025 chhungin Mizoramah sentut vei nem ngheh 50 leh rubella vei nem ngheh 11 awmin, Lunglei District-ah sentut vei 5 leh rubella vei 3 an awm a. Lunglei District aṭangin kum 2024 khan sentut vei rinhlelh endik tura sample thawn 22 aṭangin 11 chu sentut vei nem ngheh a ni a; kum 2025-ah sample thawn 24 aṭangin nem ngheh 5 leh kum 2026-ah sample thawn 23 aṭangin nem ngheh 2 (Hnahthial District ve ve) an awm bawk.

Nausen piang hlim aṭanga kum khat tlin hmaa vaccine lak tur chi hrang hrang – TB hri venna (BCG), zeng hri venna (OPV–1,2&3), kawṭhalo a bikin Rotavirus-in a thlen venna (RVV–1,2&3), pneumonia, sakawr ek hrik leh hrilawn laka venna (Penta–1,2&3) leh sentut (measles) leh rubella laka venna (MR–1st dose) la kimte hi hri danna la kim (fully immunised child) anga chhinchhiah an ni a. Kum 2025–2026 chhungin Lunglei Block-ah hri danna pek tur target nausen 942 zinga nausen 867 chuan hri danna la kimin, FIC hi 92.04% a ni a; Lungsen Block-ah target 327 zinga 243 (74.31%), Bunghmun Block-ah target 295 aṭangin 171 (57.97%) leh Tlabung Block-ah target 389 aṭangin 335 (86.12%) te chu FIC an ni.

Vawiin ṭhut khawmah hian February 28 – May 31, 2026 chhunga chhul hmawr cancer thlentu Human Papillomavirus (HPV) laka invenna tur vaccine pek runpui kalpui mekah Lunglei District chhunga vaccine pek tur hmeichhe tleirawl (kum 14 aṭanga kum 15 leh thla 3 inkar) 1,236 tinzawnah mi 533 (43.12%) chu vaccine pek an nih tawh thu tar lan a ni bawk.

Attachment