Vawiin khan Lunglei DC leh District Election Officer ni bawk Dr Ankita Chakravarty, IAS hovin DC Conference Hall-ah Lunglei District huamchhunga Assembly Constituency pasarih hnuaia Returning Officers, Assistant Returning Officers leh Sector Officers  ten election chungchang meeting neiin an thukhawm. He meeting-ah RO, ARO leh SO te kimchang taka an tel bakah Lunglei SP Pu C. Lalthanmawia leh Additional SP Pu Lalchhuanthanga te an tel bawk.

Dr Ankita Chakravarty chuan election hmachhawn turin inpuahchahna ngawrh taka kalpui zel a nih thu sawiin ECI in ruahmanna a siam angin 27^th September, 2018-ah Final Electoral Roll tlangzarh a nih tur thu a tarlang a. Returning Officers, Assistant Returning Officers leh Sector Officer 24-te pawh ruat fel tawh niin Lunglei District-ah Polling Station 185 a awm tur thu a sawi a. Boruak ralmuang tak hnuaia election kalpui anih theih na turin dan leh thupek kengkawh kawngah  ruahmanna fel tak siam lawk niin Lunglei SP Pu C. Lalthanmawia kaihhruaina hnuaiah ‘Deployment Plan’ siam a nih thu a sawi a. Kumin inthlan thupui chu ‘Accessible Elections’ anih thu sawiin pianphunga rualbanlo leh kum lama upa ten vote an thlak ve ngei theihna turin Polling Station tinah ruahmanna siam a nih tur thu a sawi bawk.

Systematic Voters Education and Electoral Participation (SVEEP) chungchang pawh sawiin Lunglei DC chuan mi puitling vote nei thei chin India khua leh tui dik tak ten vote neih hlutna an hriat thar lehzualna tur leh vote thlak pawimawhna leh vote thlak ngei tura dan in min phut thu te inzirtirna a ni a ti a. He SVEEP hmalakna hnuaiah hian Slogan Writing Competition, Painting Competition, Rally leh Mobile Van te buatsaih a nih tur thu a tarlang bawk.

Meeting zawhah hian Sector Officer te tan training buatsaih niin an hnathawh tur leh hnathawh kalphung tur inhrilhhriatna hun hman a ni a. Pu Vanlaltanpuia, DCSO, Lunglei in Powerpoint presentation hmangin zirtirna a pe a ni.