Social Welfare Minister Pu PC Lalthanliana chuan vawiin khan Mizoram State Commission for Protection of Child Rights (MSCPCR) Office, Dawrpui Vengthar -ah a hawng. Hawnna inkhawmah hian National Commission for Protection of Child Rights Chairperson Pi Stuti Kacker pawh a tel a ni.

Pu PC Lalthanliana chuan  Social Welfare Department chu Department pawimawh leh mawhphurhna ngah em em a ni a, Cabinet hnuhnung berin Women and Child Welfare Department hran din a phalsak angin Directorate hranga awm turin hma lak mek a ni, a ti. Minister chuan sawrkar laipui Ministry of Tribal Affairs chuan Mizoram-a Tribal Research Institute dinna tur cheng vaibelchhe sawmhnih leh nuai sawmpariat a pawmsak tawh a, tunah hian cheng vaibelchhe li (4) sanction a ni tawh, a ti a. Museum changtlung tak sakna tur pawh Tribal Affairs vek hian a thu in a pawmpui tawh a; Eklavya Model Residential School chu Ngopa, Tuipang, Chawngte leh Lawngtlaiah sak mek a nih thu he hunah hian a sawi bawk a ni. 

Social Welfare Minister chuan MSCPCR din thar a nih tak chungchang sawiin ram danpuiin naupang zawng zawngte tan dikna chanvo bulthum fundumental rights a pe a, state sawrkarte pawh naupangte chawikanna tura hma la tura tih niin chumi vil zui turin Commission thar hi din a ni, a ti a. India ram chu Rights of Child pawmtu ram zingah a tel avangin naupangte dikna leh chanvo humhalh kawnga hmalakna peng tam tak zingah “The Commision for Protection of Child Rights Act, 2005” siam a ni a, he dan hnuaiah hian National Commission for Protection of Child Rights din niin chutiang zelin state ah pawh MSCPCR hi din a ni, a ti. Pu PC Lalthanliana chuan Mizoram mipui nawlpuiin naupang enkawl kawngah hma kan sawn viau laiin naupang pawikhawihtute laka mipui nawlpui rilru puthmang siam that a la ngai nasa hle a, naupangte humhalhna dan tha tak tak kan neihte hi naupang ti hluthlangtu leh ti pawngpawrhtu ang deuha ngai kan awm hi a dik lo a ni, a ti a. Naupang kum 18 la tlinglo te hian pawi an khawih a nih pawhin “hrem tur an ni lova, siam that tum zawk tur an ni” tih hi khawvelin a pawm dan leh tuna kan dan hman laiin a tum ber pawh a ni, Social Welfare Minister chuan a ti. 

Khual zahawm National Commission for Protection of Child Rights Chairperson Pi Stuti Kacker pawhin MSCPCR din thar tak chu duhsakna hlanin Mizoram chu naupangte dikna leh chanvo humhalhna kawngah hmahruaitu an nih ngei a beisei a. Pawikhawihna leh mi dangte ngaihtheihlohna hluar zelna khawvelah hian naupangte chunga hleilenna a nasa telh telh a. Naupangte laka pawikhawihna hian taksa natna piah lamah rilru leh ngaihtuahna a khawih pawi nasa em em a, heng laka naupangte venhim hi kan mawhphurhna a ni, a ti.  

MSCPCR  hian sawrkarin dan a siam te, policy leh programme a duante bakah sawrkar inrelbawlna kalphung reng reng naupangte dikna leh chanvo humhalhna nen a inmil em tih a vil reng dawn a. Naupangte dikna leh chanvo humhalhna dan dinglai te a tha tawk em tih zirchiang a, a tul ang zela sawrkar finchhuah leh sawrkara rawtna thlen te, naupangte dikna leh chanvo bawhchhiatna a lo thlena an thlavang hauhsak te, naupang tanpui ngai apiang tanpuite chu MSCPCR hna thawh tur langsar zual a ni. Naupangte dikna leh chanvo rahbehsakna a lo thlenin thubuai lut kher lo pawh nise ama thu in Commission hian hma a la thei a ni. Naupang chunga hleilenna leh an dikna chanvo rahbeh sakna chungchang a ngaihtuahnaah Commission hi Civil Court thuneihna pek a ni a, mi tupawh a hmaa inlan tura koh theihna te, thuhretute thusawi lakkhawm te, record leh document eng pawh lakchhuah theihna te pek a ni a, thubuai eng pawh Magistrate te hnenah a hlan chhawng thei bawk a ni. 

Mizoram State Commission for Protection of Child Rights (MSCPCR) hawnna inkhawm hi an Chairperson Pi Sangzuali Vanchhawng in a kaihhruai a, Mizoram State Child Protection Society Program Manager Pi Amy Lalrinpuii’n Mizoram sawrkarin naupang te dikna chanvo humhalhna kawnga a hnathawh dan tlangpui a report a ni. MSCPCR Secretary tharah hian Pu Lalsangpuia chu Secretary niin member te chu - Pu J.Malsawmzuala Vanchhawng, Dr Julie Remsangpuii fambawl leh K Malsawmzuali te an ni.