3946/2024-2025

Lunglei, 2025 Pawlkut thla ni 24: February ni 12, 2025-a village council (VC) leh local council (LC) inthlanpui awm tura Mizoram State Election Commission (SEC)-in Lunglei District-a inthlan vil tura a ruat, election observer pathum te leh district election official-te chuan nimin khan Lunglei DC Conference Hall-ah inbuatsaihna leh ruahmanna hrang hrang an thlir ho.

Lunglei Municipal Council (LMC) huam chhunga local council 24-a inthlan vil turin, election observer-ah Cooperative Societies Registrar Pu John LT Sanga chu ruat a ni a. Lunglei District chhunga village council 88 chu north zone leh south zone-ah ṭhen niin, election observer (south zone)-ah Rural Development Department Joint Director Pu Vanlalrova leh election observer (north zone)-ah FCS&CA Department Joint Director (Admin) Pu Victor Lalawmpuia te ruat an ni bawk.

Election observer-te nena inkawm hona hi Lunglei District Election Officer Pi Navneet Mann chuan kaihruaiin, Lunglei District-a inpuahchahna kalpui dan report ngaihthlak a ni a. Inthlan felfai, thianghlim leh muanawm tak a awm theih nana ruahmanna hrang hrang sawi ho a ni.

He hunah hian district thuneitute chuan election observer-te lawmna thilpek atan "District khat, thar chhuah chi khat" (One District One Product - ODOP) tih hma lakna hnuaia Lunglei District ODOP thei, "balhla" hmanga tualchhung siam chhuah ei tur chi hrang hrang an lo hlan a ni.