1340/2026-2027

Lunglei, 2026 Vawkhniahzawn thla ni 8: Electoral roll en nawn runpui, Special Intensive Revision (SIR) 2026 kalpui mek chungchangah vawiin khan Electoral Roll Observer Dr Lalhriatzuali Ralte, IAS (Secretary, Labour, Employment, Skill Development and Entrepreneurship Department & Chief Executive Officer, Mizoram State Health Care Society) chuan Lunglei tlawhin, electoral roll en nawn kalpui dan a enfiah.

Electoral Roll Observer ho hian SIR 2026 chungchangah Lunglei DC Conference Hall-ah ṭhut khawm buatsaih niin, election official-te, Electoral Registration Officer (ERO) leh Assistant ERO-te, DIPRO/District Media Nodal Officer (DMNO), tlawmngai pawl leh political party ai awhte an tel a. Deputy District Election Officer Pi Zoramdini chuan hun kaihruaiin, Election Officer Pi Lalhruaitluangi'n Lunglei District chhunga draft electoral roll dinhmun leh SIR kalpui meka hma lakna tlangpui a sawi fiah.

Electoral Roll Observer Dr Lalhriatzuali Ralte chuan SIR 2026 kalpui meka Lunglei District dinhmun leh harsatna te, political party leh NGO-te ngaih dan leh thurawnte ngaithla a, a ṭul anga Election Commission of India (ECI)-a thlen tura Lunglei chu tlawh leh ṭhut khawm buatsaih a nih thu a sawi a. Lunglei chu Mizorama District lian leh voter tamna ber zinga mi a nih angin leh ram dang nena inramri a nih angin SIR kalpui danah fimkhur lehzual a pawimawh thu sawiin, mipa aia hmeichhe voter an pung chho nasa chuan ngaihtuah a tithui hle tih a sawi a. Electoral Roll felfai a awm theih nan Lunglei District Administration-in theih tawp an chhuah leh political party, Local/Village Council leh NGO hrang hrangte nen thawh hona ṭha tak an nei chu lawmawm a tih thu sawiin, final roll dik leh felfai tak a awm theih nan claim & objection leh hearing hunah ṭha taka thawh hona an neih zui zel a beisei thu a sawi a. Mawhphurtute chu electoral roll-ah India khua leh tui dik tak chauh thun an nih theihna tur te, kum 18 tling chin kim taka thun an nih theih nan leh roll-a chuang lo tur an chuan palh loh nan te theih tawp chhuah tura chahin, kum tling tharte kim taka an inziah luh theih nan leh mipuite'n ṭangkai leh uar zawka Voter Helpline App an hman theih nan theih tawp chhuaha inzirtirna kalpui turin a chah.

He hunah hian Electoral Roll Observer chuan Lunglei District-a SIR 2026 kalpui meka lehkha pawimawh en fel ngaite a en fel nghal a. Electoral roll dik leh felfai tak a awm theih nana thil pawimawh leh rawtna hrang hrangte sawi ho a ni bawk.

Special Intensive Revision, 2026 kalpui mekah hian draft electoral roll chu July ni 4, 2026 khan tihchhuah niin, Lunglei District-a assembly bial paruk – Lunglei North, Lunglei East, Lunglei West, Lunglei South, Thorang leh West Tuipuiah vote nei mipa 48,918 leh hmeichhia 49,890, an vaiin mi 98,808 awmin, Lunglei District aṭanga sipaia ṭang service voter-a inziak lut mi 478 an awm bawk a. India khua leh tui, July ni 1, 2026-a kum 18 tling chinte tan August ni 4, 2026 thlengin electoral roll-a inziah luh thar, inpaih, insawn leh siam ṭhat dilna hun hawn a ni a. Final electoral roll chu September ni 6, 2026-a tihchhuah tura ruahman a ni.

SIR kalpui hma hian Lunglei District chhungah vote nei mi 1,03,037 awmin, SIR Enumeration kalpui laiin mitthi, insawn tawh, vote nei kawp, chin hriat loh leh chhan dang vanga ziah luh theih loh mi 4,229 chu electoral roll aṭangin paih an ni a. Polling station thar pahnih hawn belh niin, polling station pakhat ṭhiah a ni thung a. Heti hian polling station 181 awmin, Booth Level Officer (BLO) 182, Assistant BLO 69, BLO Supervisor 25 leh political party ai awh Booth Level Agent (BLA) 614 ruat an ni a. Office hrang hrangah Voter Awareness Forum (VAF) din niin, VAF kal tlang hian SIR pawimawhna leh ngai pawimawh tura inzirtirna buatsaih a ni a. School 41 leh college 4-ah Electoral Literacy Club (ELC) din niin, ELC kal tlang hian voter chanvo leh mawhphurhna hriat nan leh roll-a la lut lote an luh theih nan inzirtirna buatsaih ṭhin a ni bawk.