1341/2026-2027

Kolasib, 8th July, 2026: Vawiin khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin kumin Independence Day 2026 ropui leh hlawhtling taka hman a nih theih nan thutkhawm pawimawh neih a ni. He thutkhawmah hian District chhunga Head of Offices hrang hrangte leh sawmbik te an tel a ni.

Thutkhawm kaihruaitu Bawrhsap Pu H. Dolianbuaia chuan thu sawiin, Independence Day chu India in Zalenna a hmuh champhaphak anih ang takin district chhunga sorkar department hrang hrang, tlawmngai pawlte leh mipuite tanrualna nen urhsun leh hlimawm taka hman a nih theih nan theih tawp chhuah tlân a pawimawh a ni, a ti a. Department tinte chu an hna chanvo theuha rinawm leh taima taka mawhphurna la tura chahin, khawtlang hruaitute leh mipuite pawh he  ni ropui lawmnaah hian phur taka tel theuh turin a sawm a ni.

Thutkhawmna a  rel anih angin, kumin Independence Day lawmna pui ber hi August 15, 2026 khian Kolasib Sports Stadium-ah zing dar 8:00 atangin hman a ni ang. Zing khawvar rualin sorkar leh mimal in tinah hnam puanzar zar kan a ni ang a, a hmunpuiah Khuallian in hnam puanzar pawt pharhin hnam hla sak a ni ang. National Anthem hi Govt. Diakkawn H/S Band Party ten an rem dawn a ni.

Kumin hian Parade Contingent-ah hian Armed contingent atangin 1st IR Bn. Mualvum an tel ang a, Unarmed leh School Contingent hrang hrang sorkar leh private school, college leh DIET atangin contingent thahnem tak an thawk chhuak bawk ang.

He ram ni pawimawh hlawhtling taka hman a nih theih nan hian chanvo hrang hrang intuk  nghal a ni a. Hmunhma chei ,tihfai leh a hmanna tur buatsaih  chu UD&PA, PWD leh PWD Road lam mawhphurna a ni ang a, PHE lamin tui supply an buaipui ang. Sound system leh a hmun  a thlalak leh video coverage hna chu I&PR department (DIPRO) chan tur a ni anga, First Aid leh Medical Duty - DMS/CMO/DSYO te chan a ni thung ang. Security leh Traffic herrem hna erawh Police (S.P) lamin mawh an la thung dawn a ni.

Hemi ni ah hian thu puangtu Compere tur atan Pu Samuel Lalrinawma leh Pi R.C. Vanlalhlimpuii te ruat an ni a. Independence Day hman zawh hian DC Bungalow ah at home program hmang tura rel a ni bawk.