2125/2026-2027

Lunglei, 2026 Mimkut thla ni 8: Vawiin khan Lungleia SCMO (Senior Chief Medical Officer) Office New Building Conference Hall-ah hri danna vawn ṭhatna hmanrua, Electronic Vaccine Carrier (Emvolio Vaccine Carrier) hman dan tur zir hona buatsaih a ni.

EVC hman dan zir hona hi Lunglei District Immunisation Officer Dr Christina Zonunmawii chuan kaihruaiin, zir honaa tel thawktute chu mipui rawngbawltu pawimawh tak an nih avangin an thil zir chu ṭangkai taka hmang thei tur leh an hna thawhna ṭheuhva mipuite'n a taka an ṭangkaipui ngei theih nana uluk taka zir turin a chah.

EVC hman dan zir honaah hian Lunglei District khawthlang lam lirthei kal harsatna leh luh theih lohna khua – Bunghmun RD Block, Lungsen RD Block leh Tlabung RD Block huam chhunga Sub-Centre 11 aṭangin thawktute an tel a. Pi Priyanka Jain, Black Frog Technologies Pvt. Ltd, Manipal, Karnataka chuan EVC chungchang leh a hman dan te, a enkawl dan leh hriat tur pawimawh hrang hrangte a zirtir a. Zawhna leh chhanna leh sawi hona hun hman a ni bawk.

SELCO Foundation-in CSR (Corporate Social Responsibility) kal tlanga Mamit, Lawngtlai leh Lunglei District-te tana hman tur vaccine vawn ṭhatna leh temperature dik taka hmun kilkhawr zawk thlen theihna tur, Electronic Vaccine Carrier (Emvolio Vaccine Carrier) 30 an lei chu September ni 1, 2026 khan Mizoram Health & Family Welfare Minister Pi Lalrinpuii kutah an lo hlan tawh a. Lunglei District pawhin he hmanrua (EVC) hi dawng ve tawhin, vawiin khan a hman dan tur zir hona hi buatsaih a ni.

Emvolio Vaccine Carrier hi India Black Frog Technology Company siam niin, North East-ah chuan Manipur leh Meghalaya-ah te hlawhtling taka hman a lo ni tawh a. Vaccine te a thawh dan tur ang thlapa thawk thei tur leh chhe mai lo turin EVC hian vawng ṭhain, hmun kilkhawr ber thlenga hman ṭangkai theih tura beisei a ni.