2124/2026-2027 

Dated Aizawl, the 8th September, 2026: Vawiin khan School Education Directorate Conference Hall-ah International Literacy Day vawi 60-na hman a ni a, Pu K.Lalthawmmawia, Commissioner & Secretary, School Education Department chuan khuallian niin he hun hi a hmanpui.

International Literacy Day puala hun hmanah hian khuallian Pu K.Lalthawmmawia chuan thu sawiin ziak leh chhiar thiam kawngah  state dangin an neih ve loh Mizoramin  chakna thuruk kan nei a, chu chu tlawmngaihna, midangte tana inpekna leh khawtlang mipui thawhhona tha a ni tiin  hei hi kan hmalakna leh hma kan sawn zel theih nana kan innghahna lungphum pawimawh  a ni a, state dangte chuan sum leh pai budget sang tak tak an nei a ni mai thei, keini erawhchuan sumin a lei theih loh rohlu kan nei a, hei hian hmasawn zel thei turin beiseina sang tak min pe a ni a ti.

Pu K.Lalthawmmawia chuan ziak leh chhiar thiam hian ram hmasawnna a thlen rualin kan chenna leilung humhalh a pawimawhzia min zirtir tel ngei ngei tur a ni a ti. Ziak leh chhiar thiamna hian eizawnna leh hmasawnna kawnga min hruai thei tur thiam thil dang chi hrang hrang digital literacy te, vocational skill te leh midangte nena khawsakho dan te min zirtir tel tur a ni a ti. Tunah hian fully literate state ni mah ila, kan hmabakah tih tur tam tak kan la nei a, kan thiamna te kan tahhriam belh zel a ngai a ni a ti bawk.

Department of School Education & Literacy-in N.Delhi-a International Literacy Day puala hun hmanna a buatsaihah School Education Minister Dr Vanlalthlana chu khualzahawm a ni a,  International Literacy Day puala Aizawla hun hmanah hian a tel theih loh avangin a thuchah chu Dr Lalhruaitluangi SDEO Aizawl East chuan a chhiar chhuak a. Minister hian thuchah a siamah hian Mihringte dikna, mi mal zahawmna leh nun kawng ṭha zawk siam nânte, kan chenna khawvel tichhe lo tûra thilsiamte humhalh nân te, mihringte eizawnna leh nunphunga harsatna awm te hmachhawna ding chhuak thei tûrin ziak leh chhiar thiam kan nih vek theih hi a ṭûl tak zet a ni a ti a. India ramah ziak leh chhiar thiam kawnga Mizoramin hmâ kan hruai chhunzawm zel theih nân sorkâr leh a mawhphurtu Department kuta dah mai lovin, a ṭûl anga thawk ho zêl tûrin Kohhran pawl hrang hrangte, tlâwmngai pawl te leh zirlai pâwlte, mimal ṭhahnem ngaite leh Zoram mipuite chu theihtâwp chhuaha thawk ho zêl turin a sawm a ni.

Mizoram ziak leh chhiar dinhmun hi sorkâr laipui hmalâknaa Periodic Labour Force Survey Annual Report 2023-2024 aṭangin za 98.2 a ni a, India ramah Mizoram chu 1stFully Literate State kan nih thu ni 20.5.2025 khân Mizoram Chief Minister chuan a lo puang tawh a ni. Hemi hnu hian Gov’t.of India, Ministry of Statistics and Programme Implementation hmalâkna Periodic Labour Force Survey Annual Report 2025-26 aṭangin Mizoram literacy rate chu za 99.8 a kai chho tawh a ni.

Kum 2027-a India ram chhiarpuiah in tin luh chhuaha survey neih a nih hunah pawh India ramah literacy-a pakhatna kan hauh ngei theih nân tûnah hian Mizoram sorkâr chuan puitling ziak leh chhiar thiam lo kan la neih zawng zawngte thiamtîr vek an nih theih nân theih tâwp a chhuah mek a ni. 

International Literacy Day puala hun hmanah hian ULLAS-RAERIP Worksheet te, Skill Training Programme 2026-2027 te leh 220 schools Go Live te tlangzarh a ni.

International Literacy Day  pual inkhawm hi Pi Angela Zothanpuii Director School Education-in a kaihruai a, Pi K.Zoramchhani Deputy Director-in hunserh a hmang a, Dr Lalhruaitluangi SDEO Aizawl East chuan School Education Minister thuchah a chhiar chhuak a, ziak leh chhiar thiam tharten an zir dan leh thiam dan te an sawi a. Pu PC Lalngaizuala Joint Director-in lawmthu a sawi. International Literacy Day puala hun hmanah hian School Education Directorate leh Secretariat-a officer leh thawktute, MBSE,  SCERT, Samagra Shiksha Officer te, Zirtirtu pawl Service Association hruaitute leh Skill Training Model centre a thawk te an tel a ni.