1626/2026-2027

Lunglei, 2026 Thlazing ni 3: Lunglei District-a primary sikul zirlaite'n English bulṭhut thiamna kawnga hma an sawn theihna tura Lunglei Deputy Commissioner (Bawrhsap) bul tuma District Education Office leh Disha Foundation, Chennai te nen ṭang tlanga English Language Foundation (ELF) 2.0 kalpui turah vawiin khan Lungleia School Education Complex Conference Hall-ah zirtirtute training, "Orientation and Capacity Building Programme" buatsaih a ni.

Lunglei District Bawrhsap Pi Navneet Mann chuan Khuallian niin training hawnna hun hi a hmanpui a. ELF 2.0 chu a thawh khatna ang bawka hlawhtling taka kalpui a nih a beisei thu sawiin, a hlawhtlinna atan zirtirtute an pawimawh hle dawn tih a sawi a. Zirtirtute chu an training-ah rilru pe tur leh uluk taka inzir tura chahin, a taka zirlaite an zirtir hunah zirlaite'n an sawtpui ngei theihna tura theih tawp chhuah turin a chah.

Training hawnna hun hi Lunglei District Education Officer Pu Micky R. Lalenkawla'n a kaihruai a. Disha Foundation-a Programme Manager Pi Aishwarya Sekhar chuan ELF thil tum leh pawimawhna bakah, ELF 2.0 kalpui dan tur ruahmanna tlangpui a sawi a. DC Lunglei Pi Navneet Mann leh Disha Foundation, Chennai ai awhte'n ELF kalpui tur atana thawh hona thuthlung (Memorandum of Understanding) an ziak nghal bawk.

Technical session-ah Disha Foundation aṭangin mi thiamte'n ELF 2.0 kalpuina tura sikul headmaster leh zirtirtute tana hriat tur pawimawh hrang hrang an zirtir a. Naupangte zirtir dan tur te, zirtirna hmanraw hman tur te leh endikna kalpui dan tur te a thu leh a taka zir ho niin, zawhna leh chhanna leh sawi hona hun hman a ni bawk a. Programme Coordinator Pu Joseph Lalngaisanga'n lawm thu sawiin hun a khar.

ELF 2.0 hi Lunglei District chhunga sawrkar primary sikul thlan bik 11-ah kalpui tura ruahman a ni a. Lungsen Aspirational Block-ah sikul 6 – Lungsen-I, Lungsen-II, Chhumkhum, Phairuangkai, Tuisenchhuah leh Zawlpui Government Primary School (GPS)-te; Lunglei Municipal Council (LMC) huam chhungah sikul 3 – Electric Veng-I, Rahsiveng-II leh PM Shri GPS-II, Electric Veng te; Bunghmun Block-ah Bunghmun-I GPS leh Tlabung Block-ah Tlabung-I GPS te thlan chhuah an ni.

ELF 2.0 kalpui turah hian Disha Foundation lam aṭangin zirtirtute hi a hmunah leh online-in training pek an ni tawh a. Disha Foundation aṭangin zirna hmanraw chi hrang hrang – teaching aids, workbook leh video te rawn thawnin, chumi hmang chuan zirtirtute'n an sikulah ṭheuh an zirlaite an zirtir zui dawn a. Kum 2026–2027 session first term exam zawh aṭangin zirlaite training hi kalpui ṭan tura ruahman niin, zirlaite hmasawn dan finfiahna turin a khat tawkin test buatsaih ṭhin a ni bawk ang.